ཨོྃ་སྭསྟིཿ
བཀྲ་ཤིས་མི་འགྱུར་བརྟན་པའི་ཚེ་དབང་དང་།།
བཀྲ་ཤིས་ཕྱོགས་ལས་རྣམ་པར་རྒྱལ་བའི་སླད།།
བཀྲ་ཤིས་ཚེ་རིང་དང་ནི་སྒྲོལ་དཀར་མས།།
བཀྲ་ཤིས་མ་གཡེལ་ངང་ནས་རྟག་སྐྱོང་ཤོག།
སྤྱིར་ན་སྔ་མོའི་ཤོད་སྲོལ།། གཉེན་སྟོན་མཛད་སྒོའི་ཐོག་ལ།།
ཁ་བདེ་ལྕེ་བདེ་ཅན་གྱི།། ཕོ་གསར་དར་མ་ཞིག་གིས།།
ལག་ཏུ་དར་ཆང་བཟུང་ནས།། ལྷ་ཀླུ་གཞི་བདག་ཚོགས་ལ།།
ཆང་ཕུད་མཆོད་ཁ་འཕེན་ནས།། གཏམ་གྱི་སྒོ་མོ་རྣམ་གསུམ།།
གཏམ་གྱི་འདུས་པ་རྣམ་གསུམ།། ཨ་ཁུ་དཔོན་པོའི་སྐྱེས་རབས།།
ཨ་ཞང་ཚང་གི་སྐྱེས་རྒྱུད།། གཉེན་ཚང་སྐྱེས་རབས་རྣམ་ཐར།།
བག་མ་མག་པར་བསྟོད་པ།། བག་མར་བསླབ་བྱ་གཏོང་བ།།
བུ་མོར་བཅོལ་གདམས་བྱེད་པ།། ལ་སོགས་གནང་སྲོལ་ཡོད་པ།།
སྔར་ནས་གོ་ཐོས་ཡོད་ཀྱང་།། དེ་རིང་འཆལ་པོ་ང་ལ།།
དེ་འདྲ་བྱ་རྒྱུའི་དབེན་དུས།། འགྱོད་པ་ཁོངས་ནས་སྐྱེས་སོང་།།
འོན་ཀྱང་མ་སྟོང་ཙམ་ཞིག། གཉེན་སྟོན་བཤད་པ་ཞིག་ནིི།།
མ་བགྱིད་ཐབས་མེད་གྱར་ནས།། ཞུ་བའི་ཁུལ་ཞིག་བྱས་ན།།
རིགས་རུས་ཆོ་འབྲང་འཛོམས་པའིི།། ཁྱོ་ཤུག་རྟེན་འབྲེལ་འདི་ལ།།
འཛོམས་པའི་སྐུ་མགྲོན་རྣམ་པར།། བཀྲ་ཤིས་བདེ་ལེགས་ཞུ་ཡོད།།
མ་བྲིས་ལས་ཀྱི་རི་མོས།། གཅིག་ཏུ་དམ་པོ་བསྒྲིལ་བའི།།
བུ་དང་བུ་མོ་གཉིས་ལའང་།། བཀྲ་ཤིས་བདེ་ལེགས་ཞུས་ནས།།
བཀྲ་ཤིས་རྟགས་བརྒྱད་ལམ་ནས།། རྟེན་འབྲེལ་ཉི་མོ་འདི་ལ།།
བཀྲ་ཤིས་གཡང་ཆར་ཡོང་བའི།། བཤད་པ་ཞིག་ནི་ཞུ་ན།།
བཀྲ་ཤིས་སྐྱོན་བྲལ་པདྨས།། ཁྱོ་ཤུག་གསར་བུ་གཉིས་ལ།།
ཚེ་བརྟན་བར་ཆད་ཞི་བའི།། རྟེན་འབྲེལ་ཞིག་ནི་འགྲིག་དང་།།
བཀྲ་ཤིས་བཅུད་ལྡན་བུམ་པས།། དུས་མིན་འཆི་བ་ལ་སོགས།།
འབྱུང་རྐྱེན་ནད་ཚོགས་ཞི་བའི།། རྟེན་འབྲེལ་ཞིག་ནི་འགྲིག་དང་།།
བཀྲ་ཤིས་གསེར་ཉ་ཟུང་གིས།། མཚོ་མོ་མ་ལུས་འཁྱོམས་ནས།།
འཛད་མེད་བརྩེ་དུང་རིན་ཆེན།། འཁྱོང་བའི་རྟེན་འབྲེལ་འགྲིག་དང་།།
བཀྲ་ཤིས་མི་ནུབ་རྒྱལ་མཚན།། ཚེ་གང་མི་མཐུན་ཕྱོགས་ལས།།
ཀུན་ནས་རྣམ་པར་རྒྱལ་བའི།། རྟེན་འབྲེལ་ཞིག་ནི་འགྲིག་དང་།།
བཀྲ་ཤིས་འགག་མེད་དུང་གིས།། སྙན་པའི་གྲགས་པ་མ་ལུས།།
ཕྱོགས་ཀུན་འགེགས་མེད་གྲགས་པའི།། རྟེན་འབྲེལ་ཞིག་ནི་འགྲིག་དང་།།
བཀྲ་ཤིས་དཔལ་གྱི་བེའུས།། ལྷད་མེད་བརྩེ་དུང་དེ་ཉིད།།
བསྐལ་པའི་བར་དུ་བརྟན་པའི།། རྟེན་འབྲེལ་ཞིག་ནི་འགྲིག་དང་།།
བཀྲ་ཤིས་འཁོར་ལོ་དེ་ཡིས།། བརྩེ་དུང་འགྲུལ་བཞུད་རིང་མོར།།
འགེགས་མེད་ངང་ནས་འཁོར་བའི།། རྟེན་འབྲེལ་ཞིག་ནི་འགྲིག་དང་།།
བཀྲ་ཤིས་གདུགས་གི་འཁོར་ལོས།། ཁྲམ་གཡོའི་དྲག་ཆར་དག་ལས།།
གཅིག་ཏུ་སྐྱོབ་པའི་ཆེད་དུ།། རྟེན་འབྲེལ་ཞིག་ནི་འགྲིག་དང་།།
བཀྲ་ཤིས་ལ་དང་བཀྲ་ཤིས།། རྟེན་འབྲེལ་ལ་དང་རྟེན་འབྲེལ།།
ཕུན་ཚོགས་ལ་དང་ཕུན་ཚོགས།། ཁྱེད་གསུམ་གང་དུ་ཡོད་ཀྱང་།།
དེ་རིང་འདི་རུ་བྱོན་ནས།། རྟེན་ཞལ་གསར་མ་གཉིས་ལ།།
བཀྲ་ཤིས་ཕུན་སུམ་ཚོགས་པའི།། སྨོན་ལམ་ཞིག་ནི་འདེབས་དང་།།
སྟེང་གི་ལྷ་དང་ལྷ་མིན།། བར་བཙན་འོག་ཀླུ་དག་ཀྱང་།།
དེ་རིང་འདི་རུ་བྱོན་ནས།། རྟེན་ཞལ་གསར་མ་གཉིས་ལ།།
བཀྲ་ཤིས་ཕུན་སུམ་ཚོགས་པའི།། སྨོན་ལམ་ཞིག་ནི་འདེབས་དང་།།
སྨོན་ལམ་ཐེབས་རྒྱུ་ཡོད་ན།། ད་གཟོད་ཐེབས་ངེས་ཡིན་འགྲོ།།
ཕུན་སུམ་ཚོགས་རྒྱུ་ཡོད་ན།། ད་གཟོད་ཚོགས་ངེས་ཡིན་འགྲོ།།
རྟེན་འབྲེལ་འགྲིག་རྒྱུ་ཡོད་ན།། ད་གཟོད་འགྲིག་ངེས་ཡིན་འགྲོ།།
ཨ་ཙི་སྐུ་རྩེད་ཞུས་ཡིན།། ཞུས་པར་ནོར་བ་འདུག་ན།།
ལྷན་རྒྱས་དགོངས་པ་མ་ཚོམ།། འཆལ་པོས་བཤད་རྒྱུ་དེ་ནི།།
དེ་རིང་དེ་ཙམ་ངང་ལ།། རེ་ཞིག་གཞག་པར་བྱའོ།།
དེ་མིན་ལྷན་རྒྱས་ཚོགས་ནས།། རྡོ་དང་དབྱུག་པ་འཕེན་ན།།
འཆལ་པོ་ཡིད་རེ་སྐྱོ་བ།།
ཞེས་འཆལ་པོ་བདེ་ཆེན་རྡོ་རྗེ་ནས་རང་གི་ལས་ཁུངས་སུ་ཕྱི་ལོ་༢༠༡༢
ཟླ་བ་ ༢ ཚེས་ ༢༨ རང་སྣང་གང་ཤར་མར་བྲིས་པའོ།།
