༄༅། །རྟགས་ཀྱི་འཇུག་པའི་སྙིང་པོའི་དོན་མདོ་ཙམ་བརྗོད་པ་དཀའ་གནད་གསལ་བའི་མེ་ལོང་གི་བར་འགོས་གཉིས་ཀྱི་ས་བཅད་དང་རྨོངས་མཆན་ཐུམ་བུ་སྦྲགས་མ་བཞུགས་སོ། །

 གཞུང་འདིའི་རྩོམ་པ་པོ་ནི་མཁས་མཆོག་དངུལ་ཆུ་དབྱངས་ཅན་གྲུབ་པའི་རྡོ་རྗེ་ཡིན་ལ། རྟགས་འཇུག་དཀའ་གནད་གསལ་བའི་མེ་ལོང་ཞེས་པའི་གཞུང་བཟང་འདི་ཉིད་ཕྱི་ལོ་ ༡༩༠༣ ལོར་རང་གི་སློབ་བུ་རྗེ་དྲུང་སངས་རྒྱས་རྒྱ་མཚོ་དང༌། དོན་གྲུབ་ཕུན་ཚོགས་གཉིས་ནས་དགོས་ཚུལ་ཞུས་པ་ལྟར། མཁས་མཆོག་སི་ཏུ་པཎ་ཆེན་དང་ཐམས་ཅད་མཁྱེན་པ་དངུལ་ཆུ་དྷརྨ་བྷ་དྲ་དཔལ་བཟང་པོའི་བཞེད་པ་བཞིན་སྤེལ་བའོ།།

༄༅། །གཞུང་དེའི་རྩ་བའི་ས་བཅད་ལ། ཐོག་མ་དང་། གཞུང་། མཇུག་གི་དོན་བཅས་གསུམ་ལས་དང་པོ། དང་པོ་ཐོག་མའི་དོན་ལ་མཆོད་བརྗོད་དང་བརྩམ་པར་དམ་འཅའ་གཉིས་ལས། དང་པོ་མཆོད་བརྗོད་ལའང་ལེགས་སྦྱར་སྐད་ནས་མཆོད་པར་བརྗོད་པ་དང་། བོད་སྐད་ནས་མཆོད་པར་བརྗོད་པ་གཉིས་ལས།

དང་པོ་ལེགས་སྦྱར་སྐད་ཐོག་འཇམ་དཔལ་ལ་ཕྱག་འཚལ་བ་ནི། ན་མོ་མཉྫུ་ཤྲཱི་ཡེ། གཉིས་པ་བོད་སྐད་ཐོག་འཇམ་དཔལ་དབྱངས་དང་། རང་གི་བླ་མ་ལ་ཕྱག་འཚལ་བ་ནི།

རྩ་བ་ལས། རྒྱལ་ཀུན་མཁྱེན་པའི་ཡེ་ཤེས་དཔྱིད། །

གཞོན་ནུའི་གཟུགས་[1]ཀྱིས་རྣམ་རོལ་བ། །

རྗེ་བཙུན་[2]བརྟན་པའི་འཁོར་ལོ་དང་། །

                          དབྱེར་མེད་བླ་མའི་[3]ཞབས་བཏུད་ནས། །

རྩ་འགྲེལ། རྒྱལ་ཀུན་ཏེ། དུས་གསུམ་གྱི་རྒྱལ་བ་རྫོགས་པའི་སངས་རྒྱས་ཀུན་གྱི་ཇི་ལྟ་བ་དང་། ཇི་རྙེད་པ་མཁྱེན་པའི་ཡེ་ཤེས་ཀྱི་དཔྱིད་དེ་དཔལ་ལམ་སྙིང་པོ་འཆང་བའི། བཅུ་དྲུག་ལང་ཚོའི་བདག་ཉིད་ཅན་གྱི་གཞོན་ནུའི་གཟུགས་ཀྱིས་རྣམ་པར་རོལ་བ། དེ་ནི་སུ་ཞེ་ན་རྗེ་བཙུན་བརྟན་པའི་འཁོར་ལོ་སྟེ་ངག་གི་ལྷ་འཇམ་དཔལ་དབྱངས་ཉིད་དང་། དབྱེར་བའམ་ཁྱད་མེད་པའི་རང་གི་བླ་མ་དམ་པ་དངུལ་ཆུ་ཆོས་བཟང་གཉིས་ཀྱི་ཞབས་ཀྱི་པད་མོར་སྒོ་གསུམ་གུས་པས་བཏུད་ནས་ཞེས་པའོ།།

འཕྲོས་དོན།

·        ཚིགས་བཅད་རྐང་པ་ཐ་མའི་ནས་སྒྲའི་གོ་བ་གང་ཞེ་ན། ནས་སྒྲ་དེ་ནི། མཚམས་སྦྱོར་ལྷག་བཅས་ཀྱི་ནང་གསེས་བྱ་བས་བྱ་བ་འདྲེན་པ་ཡིན་ཏེ། ནས་སྒྲའི་གོང་གི་ཕྱག་འཚལ་བའི་བྱ་བས་འདྲེན་བྱའི་བྱ་བ་བརྩམ་པར་དམ་བཅའ་བའི་བྱ་བ་དེ་འདྲེན་པས་ན་བྱ་བས་བྱ་བ་འདྲེན་པའོ།།

·      གཉིས་པ་དམ་བཅའ་བ་ནི། (སྐབས་འདི་ནས་གཞུང་འདིའི་བརྗོད་བྱ་དང་། ཁུངས་གཙོ་བོར་འཆད།)

མཁས་མཆོག་ཐོན་མིའི་ཐུགས་མཚོ་ལས། །

བྱུང་བའི་བརྡ་སྤྲོད་ཕྱི་མོ་[4]མཆོག །

རྟགས་ཀྱི་འཇུག་པའི་སྙིང་པོའི་དོན། །

མདོར་བསྡུས་ཚིག་གིས་གསལ་བར་བྱ། །

རྩ་འགྲེལ། ཁ་བའི་ལྗོངས་ཀྱི་མཁས་པའི་ཁྲོད་ནས་མཐོ་སྒང་སྐར་ཆེན་བཞིན་རྣམ་པར་བཀྲ་བའམ་མཆོག་ཏུ་གྱུར་པ་ཐོན་མི་ཞེས་ཡོངས་སུ་གྲགས་པ་དེའི་ཐུགས་ཀྱི་མཁྱེན་པའི་མཚོ་ཆེན་ལས། མངོན་པར་བྱུང་བའི་བོད་ཀྱི་བརྡ་སྤྲོད་པ་སྟེ་ལུང་དུ་སྟོན་པའི་གཞུང་གི་ཕྱི་མོ་སྟེ་གཞི་མ་ལྟ་བུ་མཆོག་ཏུ་གྱུར་བའི་བདག་ཉིད་ཅན་གྱི་གཞུང་སུམ་རྟགས་གཉིས་ལས། རྟགས་ཀྱི་འཇུག་པའི་གཞུང་དེའི་བསྟན་དོན་སྙིང་པོའམ་བཅུད་ཀྱི་དོན་རྣམས། རྒྱས་བཤད་ཀྱིས་མ་སྤྲོས་པར་མདོར་བསྡུས་ཚིག་གིས་བློ་གསར་རྣམས་ཀྱི་ཆེད་ཉུང་ངུ་གསལ་བར་བྱའོ་ཞེས་པའོ།།

འཕྲོས་དོན།

·        བརྩམ་པར་དམ་བཅའ་དགོས་དོན།

·        གཞུང་མཚམས་འདི་ནས་དཀའ་གནད་གསལ་བའི་མེ་ལོང་འདི་བརྩམ་དགོས་དོན་དང་། དེའི་བརྗོད་བྱ། དེ་བཞིན་དེའི་ཁུངས་བཅས་བསྟན་ཏེ། དང་པོ་བརྩམ་དགོས་དོན་ནི། རྟགས་ཀྱི་འཇུག་པའི་དོན་རླིང་བ་རྣམས་མདོར་བསྒྲིལ་ཏེ་གོ་རྟོགས་གསལ་བར་བྱ་བའི་ཕྱིར་བརྩམས་པ་དང་། གཉིས་པ་བརྗོད་བྱ་ནི། བོད་ཀྱི་བརྡ་སྤྲོད་པའི་གཞུང་དག་གི་ནང་ནས། ཕྱི་མོར་གྱུར་བ་སུམ་རྟགས་གཉིས་ནས་སྐབས་དོན་རྟགས་ཀྱི་འཇུག་པའི་སྙིང་པོའི་དོན་ནི་གཞུང་འདིའི་བརྗོད་བྱ་ཡིན། གསུམ་པ་གཞུང་དེའི་ཁུངས་ནི། སློབ་དཔོན་ཐོན་མིས་མཛད་པའི་རྟགས་ཀྱི་འཇུག་པའི་གཞུང་ཉིད་ཡིན་པའང་འདི་ནས་རྟོགས་པར་གྱུར་རོ།།

གཉིས་པ་གཞུང་དོན་(དངོས་)ལ་གཉིས། བོད་ཡིག་སྤྱིའི་རྟགས་ཀྱི་དབྱེ་བ་དང་། ནང་གསེས་(ཡི་གེའི་བྱེ་བྲག་སོ་སོའི་) རྟགས་ཀྱི་དབྱེ་བ་གཉིས་ལས། དང་པོ་(བོད་ཡིག་སྤྱིའི་རྟགས་ཀྱི་དབྱེ་བ་) ནི།

སྤྱིར་ན་དབྱངས་མོ་གསལ་བྱེད་ཕོ། །

·        སྤྱིར་དབྱངས་ལ་མོ་དང་གསལ་བྱེད་ལ་ཕོར་བཏགས་དགོས་དོན་ནི། ཨ་ཀྱ་ཡོངས་འཛིན་གྱིས་གསལ་བྱེད་རྣམས་རྗོད་པའི་རླུང་ཤུགས་གསལ་ཞིང་གྲིམ་པས་ཕོ་ཡིག་དང་། དབྱངས་ཡིག་བཞི་རྗོད་པའི་རླུང་ཤུགས་མི་གསལ་ཞིང་ལྷོད་པས་སྤྱིར་མོ་ཡིག་ཏུ་གསུངས་སོ།། [5]ཞེས་གསུངས་པ་ལྟར་མདོར་ན་སྒྲ་རྩོལ་འཇམ་པའི་ཆ་ནས་དབྱངས་རྣམས་མོ་དང་། སྒྲ་རྩོལ་རྩུབ་པའི་ཆ་ནས་གསལ་བྱེད་རྣམས་ཕོར་བཏགས་སོ།།

·        སྤྱིར་བོད་ཀྱི་བརྡ་སྤྲོད་པའི་གཞུང་དག་ན་དབྱངས་གསལ་གཉིས་ཀྱི་མཚན་ཉིད་དུ། དང་པོ་དབྱངས་ཀྱི་མཚན་ཉིད་ནི་ང་རོའིི་རྣམ་པ་ཅན་གྱིི་ཆ་ནས་བཞག་པའི་ཡི་གེ་དང་། གཉིས་གསལ་བྱེད་ནི། རང་གྲོགས་དབྱངས་དང་སྦྱར་ནས་རང་གི་བརྗོད་དོན་གསལ་བྱེད་པའི་ཡི་གེ་ཞེས་འདོད་ཀྱང་། དེ་ལ་ཞིབ་པར་བལྟས་ན་ད་དུང་དཔྱད་རྒྱུ་ཡོད་དེ། སྤྱིར་བོད་ཁམས་ཀྱི་མཁས་པའི་ཁྲོད་དུ་དབྱངས་ལྔ་དང་བཞིར་འདོད་པའིི་བཞེད་པ་མི་འདྲ་བ་འགའ་ཞིག་ཡོད་པས། གཅིག་ཏུ་ད་ལྟའི་ཆར་ཕྲན་ལ་དབྱངས་ལྔ་དང་བཞི་གང་འཐད་ཅེས་དྲིས་ན་ལན་ཞུ་རྒྱུ་མེད་མོད།

འོན་ཀྱང་འདོད་ཚུལ་གཉིས་པོ་དེ་ལ་གཞི་བྱས་ནས་བལྟས་ན་དབྱངས་གསལ་གཉིས་པོ་མཚན་ཉིད་ལུགས་གཉིས་པོས་གཅིག་མཐུན་དུབཞེད་ཐབས་གཏན་ནས་བྲལ། གང་ཡིན་ཞེ་ན་ལྔར་འདོད་པ་དག་གིས་སྲོག་ཞུགས་ཁས་བླངས་པས། གང་ཞིག་སྲོག་ཞུགས་བཞེད་ཕྱིན་གསལ་བྱེད་དག་དབྱངས་དང་མ་འགྲོགས་པར་རང་སྟོབས་ཀྱིས་སྒྲ་དབྱུང་ཐབས་མེད་པར་ཤུགས་ཀྱིས་གྲུབ་པས་དེར་བརྟེན་ལུགས་འདི་ལ་བལྟས་ནས་མཚན་ཉིད་ཅིག་བཞག་ན། དང་པོ་དབྱངས་ནི། རང་སྒྲ་མི་གསལ་བའི་ཆ་དང་རང་སྒྲ་གསལ་བའི་ཆ་སྟེ་ཕོ་ཡིག་དང་སྦྱར་བ་ན་ཕོ་ཡིག་སོ་སོའི་སྒྲ་འབྱིན་པའིི་ནུས་པ་དང་ལྡན་པའིི་ཡི་གེ་དང་།  གཉིས་པ་གསལ་བྱེད་ནི། རང་གྲོགས་དབྱངས་དང་སྦྱར་ནས་རང་གི་བརྗོད་དོན་གསལ་བྱེད་པའི་ཡི་གེའོ་ཞེས་བརྗོད་དགོས་པར་སེམས།

གཉིས་པ་དབྱངས་བཞིར་འདོད་པ་དག་གི་ལུགས་ལ་དབྱངས་གསལ་གྱི་མཚན་ཉིད་དུ་དང་པོ་དབྱངས་ཀྱི་མཚན་ཉིད་ནི། རང་སྒྲ་མི་གསལ་ཞིང་རང་གྲོགས་གསལ་བྱེད་དང་སྦྱར་ནས་རང་གི་ང་རོ་འབྱིན་པའི་ཡི་གེ་དེ་དག་ལ་དབྱངས་དང་། གཉིས་པ་གསལ་བྱེད་ནི། གཞན་ལ་བསྟེན་མི་དགོས་པར་རང་སྟོབས་ཀྱིས་རང་སྒྲ་འབྱིན་ནུས་པའི་ཡེ་གེ་ཞེས་གཞག་དགོས་པར་སེམས་ཀྱང་། དཔྱོད་ལྡན་རྣམས་ནས་ད་དུང་ཐུགས་སྣང་མཛད་འཚལ་ཞེས་ཞུ་རྒྱུ་ཡིན།

གཉིས་པ་(ནང་གསེས་(ཡི་གེའི་བྱེ་བྲག་སོ་སོའི་)རྟགས་ཀྱི་དབྱེ་བ་)ལ་གསུམ། མིང་གཞི་ཡེ་གེ་སྤྱིའི་རྟགས་ཀྱི་དབྱེ་བ་བཤད་པ་དང་། སྔོན་འཇུག་རྟགས་ཀྱི་འཇུག་པ་བཤད་པ། རྗེས་འཇུག་རྟགས་ཀྱི་འཇུག་པ་བཤད་པའོ།།   (དེ་དག་ལས་)དང་པོ་(མིང་གཞི་ཡེ་གེ་སྤྱིའི་རྟགས་ཀྱི་དབྱེ་བ་བཤད་པ་)ནི།  (རྟགས་ཀྱི་དབྱེ་བ་ལ་དང་པོ་རྟགས་གྲངས་ངོས་བཟུང་བ་ནི།)    དེ་ཕྱིར་ཀཱ་ལི་སུམ་ཅུ་པོ།།                     ཕོ་ཡི་ཡི་གེ་འབའ་ཞིག་ལ།།

ནང་གསེས་སྡེ་ཚན་ལྔར་དབྱེ་སྟེ།།  

(གཉིས་པ་རྟགས་སོ་སོའི་རང་ཁོངས་ཀྱི་ཡེ་གེ་ངོས་བཟུང་བ་ནི།)

ཀ་ཅ་ཏ་པ་ཙ་རྣམས་ཕོ།།   ཁ་ཆ་ཐ་ཕ་ཚ་མ་ནིང་།།      

ག་ཇ་ད་བ་ཛ་ཝ་ཞ།།            ཟ་འ་ཡ་ཤ་ས་རྣམས་མོ།།           

ང་ཉ་ན་མ་ཤིན་ཏུ་མོ།།    ར་ལ་ཧ་ཨ་མོ་གཤམ་སྟེ།།          

ཨ་ནི་མཚན་མེད་ཅེས་ཀྱང་བྱ།།[6]

·      སྔོན་རྗེས་དང་དབྱངས་དེ་བཞིན་མགོ་འདོགས་བཅས་ཀྱི་སྦྱར་གཞིར་གྱུར་པས་ན་མིང་གཞི་ཞེས་བྱ།

·      མཚམས་འདིར་རྟགས་ཀྱི་འཇུག་པའི་གཞུང་ལས་ཕོ་ཡིག་གསལ་བྱེད་ལ་སྡེ་པ་ག་ཚོད་ཡོད་མེད་སྐོར་གསལ་ཡང་འདིར་མ་གསུངས་པའི་རྒྱུ་མཚན་ནི་དེ་ལས་ཁ་གསལ་གསུངས་ཟིན་པས་འདིར་ཡང་སྐྱར་ཟློས་སྐྱོན་དུ་འགྲོ་བར་དྭོགས་ནས་མི་གསུངས་པའོ།།

·      འོ་ན་རྟགས་དག་ཀྱང་འཇུག་པ་ལས་གསུངས་མ་ཟིན་ནམ་ཞེ་ན། གསུངས་ཟིན་མོད་ཀྱང་ཁ་གསལ་མི་གསལ་བས་འདིར་དགོས་པའི་དབང་གིས་ཁ་གསལ་བཅོས་ཏེ་སླར་ཡང་གསུངས་པ་ལགས་པས་སྐྱོན་མེད་དོ།།

·      ལོ་ཆེན་ནམ་བཟང་དང་། ཞ་ལུ་ལོ་ཙ་བ། རྣམ་གླིང་པཎ་ཆེན་བཅས་ཀྱིས་ཨ་ཡིག་ཉིད་རྟགས་མེད་དུ་འདོད་པ་དང་། པྲ་ཏི་རིན་ཆེན་དོན་གྲུབ་དང་། ཨ་ཀྱཱ་ཡོངས་འཛིན། རྣམ་གླིང་བཅས་ཀྱིས་མོ་གཤམ་མམ་མ་ནིང་མཚན་མེད་དུ་འདོད། དེ་ལྟར་འདོད་པའི་རྒྱུ་མཚན་ནི་མཚམས་འདིའི་རྩ་བ་ཡང་དེ་དག་གིས་སི་ཏུ་བཞིན་མིན་པར། ར་ལ་ཧ་ནི་མོ་གཤམ་སྟེ།། མ་ནིང་ཚད་མེད་ཅེས་ཀྱང་བྱ།། གསལ་བར་བཞེད་དོ།།

ཡང་རྣམ་གླིང་གིས་ཨ་ཉིད་ཕོ་རྟགས་སུ་འདོད་པ་དེ་འདྲ་ཡོད་རུང་། དེ་དག་གི་ལན་དུ་འགྲེལ་ཆེན་ལས་རྟགས་ཀྱི་འཇུག་པའི་གཞུང་མཚམས་འདིར་རྒྱས་པར་གསུངས་ཡོད་པས་འདིར་སླར་ཡང་སྤྲོས་པའི་ངལ་མི་བྱས་དེ་ཙམ་གྱིས་འཐུས་པར་བྱེད་དོ།།

གཉིས་པ་སྔོན་འཇུག་རྟགས་ཀྱི་འཇུག་པ་བཤད་པ་ལ་གཉིས། རྟགས་ཀྱི་དབྱེ་བ་དང་། རྟགས་ཀྱི་འཇུག་ཚུལ་ལོ།། དང་པོ་(སྔོན་འཇུག་རྟགས་ཀྱི་དབྱེ་བ་)ནི། (སྔོན་འཇུག་རྟགས་ཀྱི་དབྱེ་བ་ལ་ཡང་དང་པོ་སྔོན་འཇུག་གི་གྲངས་ངོས་བཟུང་བ་དང་།)

སྔོན་འཇུག་ལྔ་༌༌༌༌༌༌༌༌

(རྟགས་གྲངས་དང་སྦྲགས་དེ་དག་གི་ཁོངས་གཏོགས་ཡེ་གེ་སོ་སོ་ངོས་བཟུང་བ།)

༌༌༌༌༌༌༌༌༌༌༌༌༌༌༌༌༌༌༌༌༌༌ཡི་བ་ཡིག་ཕོ།།            ག་ད་མ་ནིང་འ་མོ་ཡིག།

མ་ནི་ཤིན་ཏུ་མོ་ཡིན་ནོ།།[7] 

·      སྔོན་འཇུག་མཚན་ཉིད་ནི། རང་གི་འཇུག་ཡུལ་མིང་གཞི་ཡི་གེའི་སྔོན་དུ་ཞུགས་པས་ན་སྔོན་འཇུག་ཅེས་བྱ།

·      སྐབས་འདིར་རྟགས་ཀྱི་འཇུག་པ་ལས། མོ་ཡི་ཡི་གེའི་ནང་ནས་ནི། །འཇུག་པའི་ཡི་གེ་བཅུ་དབྱུང་བྱ། །འཇུག་པ་བཅུ་ཡི་ནང་ནས་ནི། །སྔོན་འཇུག་ཡི་གེ་ལྔ་དབྱུང་བྱ། ཞེས་པའི་སྐབས་ནས་སྔོན་འཇུག་དབྱུང་ཁུངས་གསལ་བར་བསྟན་ཟིན་པས་འདིར་སྔོན་འཇུག་གི་དབྱུང་ཁུངས་མི་བཤད་པར་ཐད་ཀར་རྟགས་བཞི་པོའི་ངོས་འཛིན་མཛད་པའོ།།

·      འོ་ན་རྟགས་ཀྱི་འཇུག་པ་ལས་སྔོན་འཇུག་རྟགས་ཀྱི་ངོས་འཛིན་གསུངས་མེད་དམ་ཞེ་ན། དེར་རྟགས་ཀྱི་གྲངས་ཙམ་ལས་ལྔ་པོ་སོ་སོའི་རྟགས་ངོས་འཛིན་ཁ་གསལ་མཛད་མེད།

·      འོ་ན་ལྔ་པོ་དེ་དག་གི་རྟགས་དེ་དང་དེ་ཡིན་ཇི་ལྟར་ཤེས་སམ་ཞེ་ན། དེ་ནི་རྟགས་ཀྱི་འཇུག་པའི་སྔོན་འཇུག་གི་གང་ལ་གང་གིས་འཇུག་པ་[8]བཤད་པ་དང་། ཞར་བྱུང་མི་འཇུག་པ་[9]བཤད་པ། དེ་བཞིན་སྔོན་འཇུག་ཅི་ཕྱིར་འཇུག་པའི་གཞུང་[10]བཤད་པའི་སྐབས་བཅས་ཀྱི་རིགས་པ་ལས་སྔོན་འཇུག་ལྔ་པོའི་རྟགས་གང་དང་གང་ཡིན་གསལ་བར་རྟོགས་པའི་ཕྱིར། ད་བར་སྔོན་འཇུག་གི་རྟགས་ལ་མིང་རྗེས་གཉིས་ཀྱི་རྟགས་བཞིན་མཁས་པ་རྣམས་བཞེད་པ་མི་མཐུན་པ་མ་བྱུང་བར་མཐུན་པར་བྱུང་བའི་གནད་ཀྱང་འདི་རང་ལས་མ་འདས།

གཉིས་པ་(རྟགས་ཀྱི་)འཇུག་ཚུལ་ལ་གསུམ། གང་ལ་འཇུག་པ་དང་། གང་གིས་འཇུག་པ་ཐུན་མོང་དུ་བཤད་པ་དང་། ཇི་ལྟར་འཇུག་པ་བཤད་པ་དང་། ཅི་ཕྱིར་འཇུག་པ་བཤད་པའོ[11]།།

དང་པོ་(གང་ལ་འཇུག་པ་དང་། གང་གིས་འཇུག་པ་ཐུན་མོང་དུ་བཤད་པ། )ནི།

དེ་རྣམས་གང་ལ་གང་འཇུག་ནི།།         ཕོ་ཡིག་བ་ནི་ཀ་ཅ་ཏ།།

ཙ་ག་ང་ཇ་ཉ་ད་ན།།                        ཛ་ཞ་ཟ་ར་ཤ་སར་འཇུག།

མ་ནིང་ག་ནི་ཅ་ཏ་ཙ།།                 ཉ་ད་ན་ཞ་ཟ་ཡ་ཤ།

སར་འཇུག་མ་ནིང་ད་ཡིག་ནི།།          ཀ་པ་ག་བ་ང་མར་འཇུག།

མོ་ཡིག་འ་ནི་ག་ཇ་ད།།                བ་ཛ་ཁ་ཆ་ཐ་ཕ་ཚར།།

ཤིན་ཏུ་མོ་ཡི་མ་ཡིག་ནི།།              ཁ་ཆ་ཐ་ཚ་ག་ཇ་ད།།

ཛ་ང་ཉ་ན་རྣམས་ལ་འཇུག། [12]     

·      འོན་ཀྱང་མཚམས་འདིར་རྟགས་ཀྱི་འཇུག་པ་བཞིན་ཞར་བྱུང་མི་འཇུག་པ་མི་བཤད་པའི་དགོས་པ་ནི་གང་ཞེ་ན། འདིར་རྟགས་འཇུག་བཞིན་བསྡུས་པོ་མ་ཡིན་པར་མིང་གཞི་ཡི་གེ་གང་དང་གང་ལ། སྔོན་འཇུག་གང་དང་གང་གིས་འཇུག་པ་ཡི་གེ་རེ་རེ་བཞིན་ཁ་གསལ་འཆད་ཟིན་པར་བརྟེན་མི་འཇུག་པའི་ས་བཅད་དམིགས་བསལ་དགོས་གལ་མེད་པས་མ་གསུངས་པའོ།།

·      སྐབས་འདིར་སྔོན་རྗེས་གཉིས་ཀྱི་འཇུག་ཡུལ་མིང་གཞི་དེ་མགོ་འདོགས་དབྱངས་གསུམ་གྱི་མ་བཅིངས་པའི་རྐྱང་པ་ཁོ་ན་ཡིན་ནམ་ཡང་ན་གང་ཡིན་ཞེ་ན། སི་ཏུས་སྐབས་འདིར། ༌༌༌༌༌༌༌༌༌༌༌༌༌༌༌༌༌༌༌༌འདིར་བསྟན་གཙོ་ཆེ་ཆུང་གི་དབང་དུ་བྱས་ན་བདེན་མོད། སྤྱིར་བཏང་ཙམ་ལ་མིི་རུང་བའི་རྒྱུ་མཚན་ཅིའང་བཤད་དུ་མེད་དོ།།[13] སོགས་རྒྱས་པར་གསུངས་པ་ལྟར་ལགས་པས་མདོར་ན་སི་ཏུའི་ལུགས་ལ། དཔེར་ན། (བསྒྲུབས)ལྟ་བུ་ཞིག་ཆ་མཚོན་ན། སྔོན་རྗེས་བ་གཉིས་ཀྱི་འཇུག་ཡུལ་གཙོ་བོ་ག་ཉིད་ལས་མ་འདས་ཀྱང་། མགོ་ཅན་ས་དང་། འདོགས་ཅན་ར་བཏགས། དེ་བཞིན་དབྱངས་བཅས་ཀྱང་སྤྱིར་བཏང་ཙམ་གྱིས་དབང་དུ་བཏང་ན་སྔོན་རྗེས་གཉིས་ཀྱི་འཇུག་ཡུལ་མིན་པའི་རྒྱུ་མཚན་ལྷག་པོ་གང་ཡང་བཤད་རྒྱུ་མེད་པས་དེ་དག་ཀྱང་མིང་གཞིའི་ཆ་ལག་ལྟ་བུར་འདོད་ཀྱང་འགལ་མེད་པར་བཞེད་དོ།།

གཉིས་པ་(ཇི་ལྟར་འཇུག་པ་བཤད་པ་)ནི། (དྲི་བས་མཚམས་སྦྱར་བ།)

ཇི་ལྟར་འཇུག་པར་བྱེད་ཅེ་ན།།         

(ལན་འདེབས།)

ཕོ་ནི་སྒྲ་རྩོལ་དྲག་པར་འཇུག།           མ་ནིང་རན་པར་འཇུག་པ་ཡིན།།           

མོ་ནི་ཞན་པའི་ཚུལ་གྱིས་ཏེ།།            ཤིན་ཏུ་མོ་ནི་མཉམ་པ[14]ས་སོ། །[15]

·      གཞུང་འདི་ནས་སྔོན་འཇུག་ཕོ་བ་ཡིག་སོགས་ལྔ་པོ་ལ་ཕོ་མོ་སོགས་བཏགས་པའི་དགོས་པ་ཡང་འདི་ནས་རྟོགས་པར་འགྱུར་རོ།།

·      འོ་ན་སྔོན་འཇུག་གི་རྟགས་རྣམས་སྔོན་འཇུག་གི་ཡི་གེ་སོ་སོའི་རང་སྒྲ་ལས་བཏགས་པ་མ་ཡིན་ནམ་ཞེ་ན། གོང་དུ་ཞུས་པ་བཞིན་དེ་དག་ནི་རང་སྒྲ་ལས་མི་བཏགས་པར་རང་གི་འཇུག་ཡུལ་མིང་གཞི་ཡེ་གེ་དང་སྦྱར་ནས་སམ་མིང་གཞི་ཡི་གེ་ལ་ཞུགས་པའི་ཚེ་སྒྲ་རྩོལ་དྲག་ཞན་འགྱུར་ཚུལ་གྱི་ཆ་ནས་བཏགས་པའོ།།

·      ཞ་ལུ་དང་རྣམ་གླིང་སོགས་ཀྱིས་མཉམ་པ་ཞེས་པ་དྲག་ཞན་མཉམ་པའི་དོན་དུ་བཞེད་ཀྱང་། དེའི་ལན་དུ་སི་ཏུས་(དེ་ལྟ་ན་མ་ནིང་གི་འཇུག་ཚུལ་དང་ཟློས་པར་འགྱུར།)[16]ཞེས་གསུངས་པ་ཉིད་དོན་ལའང་གནས་པར་སེམས་སོ།།

གསུམ་པ་སྔོན་འཇུག་ཅི་ཕྱིར་འཇུག་པ་བཤད་པ་ལ་གཉིས།[17] སྤྱིར་བདག་གཞན་དུས་གསུམ་ངོ་སྤྲོད་པ། བྱེ་བྲག་ཏུ་སྔོན་འཇུག་སོ་སོའི་འཇུག་ཡུལ་བཤད་པའོ།། དང་པོ་(སྤྱིར་བདག་གཞན་དུས་གསུམ་ངོ་སྤྲོད་པ་)ལ། བདག་གཞན་གྱི་རྣམ་བཞག་ངོ་སྤྲོད་བཤད་པ་དང་། དུས་གསུམ་གྱི་རྣམ་བཞག་ངོ་སྤྲོད་བཤད་པ་དང་། བདག་གཞན་ལས་དུས་གསུམ་ཁྱབ་ཆེ་བཤད་པ་དང་། དུས་གསུམ་ལས་ལོགས་སུ་བདག་གཞན་དབྱེ་བའི་དགོས་པ་བཤད་པ་དང་། བདག་གཞན་ལས་ལོགས་སུ་དུས་གསུམ་དབྱེ་བའི་དགོས་པ་བཤད་པ་དང་། བདག་དོན་ཕལ་པ་བཤད་པ་དང་དྲུག་(ལས།) དང་པོ་(བདག་གཞན་གྱི་རྣམ་བཞག་ངོ་སྤྲོད་བཤད་པ་)ནི། (དེ་ལའང་དྲི་བས་མཚམས་སྦྱར་ཞིང་ལན་གྱི་གླེང་སློང་བ།)

ཅི་ཕྱིར་འཇུག་ཅི་ཕྱིར་འཇུག་པར་བྱེད་ཅེ་ན།།      ཐོག་མར་འདི་ལྟར་ཤེས་དགོས་ཏེ།།

·       ཅི་ཕྱིར་འཇུག་པའི་གཞུང་འདི་མ་བཤད་པའི་སྔ་རོལ་དུ་བདག་གཞན་དུས་གསུམ་དང་། བྱ་བྱེད་ལས་གསུམ་གྱི་རྣམ་བཞག་ཁ་གསལ་མ་བྱུང་ཚེ་གཞུང་འདིའི་བསྟན་དོན་ཇི་བཞིན་རྟོགས་དཀའ་བར་གཟིགས་ནས་ཐོག་མར་སྤྱི་བཤད་ཀྱི་ཚུལ་དུ་བདག་གཞན་དུས་གསུམ་ངོས་འཛིན་དང་། ཁྱབ་ཚད་སོགས་སྔ་རོལ་དུ་གསུང་པར་འདོད་དེ།

(བདག་གཞན་གྱི་རྣམ་བཞག་ངོ་སྤྲོད་བཤད་པ་དངོས་ནི།)

ལས་གང་ཞིག་ལ་བྱེད་པ་པོ།།            གཞན་དང་དངོས་སུ་འབྲེལ་བ་ཡི།།

དབང་དུ་བྱས་ནས་བྱེད་པོ་དང་།།   དེ་ཡི་བྱེད་པ་གཉིས་པོ་ནི།།

དངོས་པོ་བདག་ཡིན་བྱ་ཡུལ་དང་།། བྱ་བ་གཉིས་པོ་དངོས་པོ་གཞན། །

·       བདག་གཞན་དེ་བྱེད་འབྲེལ་ལས་ཚིག་མ་གཏོགས་བྱེད་མེད་ལས་ཚིག་གཞག་རྒྱུ་མེད།

བདག་གཞན་ངོ་སྤྲོད་ཀྱི་རེའུ་མིག

ཨང་།	དཔེ་གཞི།	མིང་རྐྱང་།	གསལ་བཤད།	བྱ་ཚིག་ལས་གྲུབ་པའིི་མིང་དང་། བྱ་ཚིག	བདག་གཞན་ངོས་འཛིན།	ཟུར་བརྗོད།
༡	བཀྲ་ཤིས་ཀྱིས་དེབ་ཏུ་ཡི་གེ་བྲིས།	བཀྲ་ཤིས།	མིང་རྐྱང་གི་བྱེད་པོ་ལས་བདག་མིན་ལ་བདག་གི་ཁོངས་སུ་ཡང་མི་བསྡུ།	འབྲི་བ་པོ།	བདག་དངོས།
				བྱ་ཚིག་ད་ལྟ་བ་སྟེ། འབྲི་བར་བྱེད།	བདག་གི་ཁོངས་སུ་བསྡུ།
		ཡི་གེ	མིང་རྐྱང་ལས་གྲུབ་པའི་བྱ་ཡུལ་ལས་གཞན་མིན་ལ་གཞན་གྱི་ཁོངས་སུ་ཡང་མིི་བསྡུ།	བྲི་བྱའམ་བྲི་རྒྱུ།	གཞན་དངོས།
				བྱ་ཚིག་མ་འོངས་པ་སྟེ། བྲི་བར་བྱ།	གཞན་གྱི་ཁོངས་སུ་བསྡུ།
		དེབ།	མིང་རྐྱང་ལས་གྲུབ་པའི་བྱ་ཡུལ་ལས་གཞན་མིན་ལ་གཞན་གྱི་ཁོངས་སུ་ཡང་མིི་བསྡུ།	བྱ་ཡུལ་ལ་བྲི་ས་དང་བྲི་རྒྱུ་གཉིས་ལས་འདི་ནི་བྲི་ས་ལ་གོ་དགོས།	྾ ྾ ྾	བདག་གཞན་གཉིས་ལས་གཞན་མིན། གང་ཞེ་ན་གཞན་ཡིན་ན་མ་འོངས་པའི་བྱ་ཚིག་གང་ཞིག་རྒྱུའམ་ཡས་གཉིས་ཚིག་གྲོགས་ཅན་ཡིན་དགོས་པ་ལས། ཚིག་གྲོགས་ས་ཅན་འདི་གཞན་དུ་ནམ་ཡང་འཇུག་མི་རུང་།

·       སའི་ཚིག་གྲོགས་ཅན་གྱི་(བྲི་ས་)ཞེས་པ་བྱ་ཡུལ་གང་ཞིག་རྣམ་དབྱེ་གཉིས་པའི་བྱ་ཡུལ་ལས། བདག་གཞན་གཉིས་ལས་གཞན་ལ་བྱ་ཡུལ་ཞེས་པའི་བྱ་ཡུལ་དེ་འདི་ལ་གོ་མི་རུང་། འོ་ན་བདག་གཞན་གཉིས་ལས་གཞན་མཚོན་བྱེད་ཀྱི་བྱ་ཡུལ་དེ་ལ་ཚིག་གྲོགས་གང་འཇུག་གམ་ཞེ་ན། རྒྱུའམ་ཡས་ལྟ་བུ་འཇུག་སྟེ་དཔེར་ན། བྲི་རྒྱུའམ་བྲི་ཡས་ཞེས་པ་ལྟ་བུའོ།།

ཞོར་དུ་བྱ་བྱེད་ལས་གསུམ་ངོ་སྤྲོད་ཀྱི་རེའུ་མིག

༡	འབྲི་བ་པོ།	བདག་དངོས།	བྱེད།
༢	བྱ་ཚིག་ད་ལྟ་བ་སྟེ། འབྲི་བར་བྱེད།	བདག་གི་ཁོངས་སུ་བསྡུ།	བྱ།
༣	བྲི་བྱའམ་བྲི་རྒྱུ།	གཞན་དངོས།	ལས།
༤	བྱ་ཚིག་མ་འོངས་པ་སྟེ། བྲི་བར་བྱ།	གཞན་གྱི་ཁོངས་སུ་བསྡུ།	བྱ།

·       བདག་གཞན་དུས་གསུམ་དང་བྱ་བྱེད་ལས་གསུམ་སོ་སོར་བཀྲལ་བའི་དགོས་པ་གང་ཡོད་ཅེ་ན། བདག་གཞན་དངོས་གང་དང་གང་ཡིན་མིན་དང་། དེ་དག་སོ་སོའི་ཁོངས་སུ་གང་དང་གང་བསྡུས་ཡོད་མེད་ཤེས་ཕྱིར་སོ་སོར་བཤད་པའོ།།

གཉིས་པ་(དུས་གསུམ་གྱི་རྣམ་བཞག་ངོ་སྤྲོད་བཤད་པ་)ནི།

དེ་བཞིན་བྱེད་པ་པོ་གཞན་དང་།།   དངོས་སུ་འབྲེལ་མིན་ཇི་ལྟར་ཡང་།།   

བྱ་བ་བྱས་ཟིན་འདས་པ་དང་།།    བྱ་བ་བྱེད་འགྱུར་མ་འོངས་དང་།།    

བྱེད་བཞིན་པ་ནི་ད་ལྟ་བ།།

ཤིང་སོགས།	མ་འོངས།	ད་ལྟ།	འདས་པ།	སྐུལ་ཚིག
བྱེད་འབྲེལ།	གཅད།	གཅོད།	བཅད།	ཆོད།
བྱེད་མེད་ལས་ཚིག	ཆད།	ཆད།	ཆད།

·       སྤྱིར་དུས་ཀྱི་དུས་གསུམ་དང་། བྱ་ཚིག་དུས་གསུམ་གཉིས་སུ་ཡོད་པ་དེ་གཉིས་དབར་ལ་ཁྱད་པར་གང་ཡོད་ཅེ་ན། སྤྱིར་དུས་གསུམ་དུས་རེ་རེ་ལའང་བྱ་ཚིག་གི་དུས་གསུམ་སྦྱར་རྒྱུ་ཡོད་ཀྱང་། བྱ་ཚིག་གིི་དུས་གཅིག་ལ་དུས་ཀྱི་དུས་གསུམ་གཞག་རྒྱུ་མེད་པའི་ཁྱད་པར་ཡོད་པར་སེམས།

གསུམ་པ་(བདག་གཞན་ལས་དུས་གསུམ་ཁྱབ་ཆེ་བཤད་པ་ནི།)

དེ་ཕྱིར་དུས་གསུམ་དབྱེ་བས་ནི།།         བྱེད་ལས་དང་འབྲེལ་ངག་གི་ནི།།

སྦྱོར་བ་ཀུན་ལ་ཁྱབ་པ་ཡིན། །

བཞི་པ་(དུས་གསུམ་ལས་ལོགས་སུ་བདག་གཞན་དབྱེ་བའི་དགོས་པ་བཤད་པ་)ནི།

བདག་གཞན་དབྱེ་བས་དེ་ཙམ་དུ།། ཁྱབ་པ་མིན་ཡང་བྱེད་པོ་དང་།།

བྱ་ཡུལ་བསྡུ་ཕྱིར་དབྱེ་བ་དེ།།            མཛད་ནས་བདག་གཞན་དང་འབྲེལ་བའི།།

བྱ་བྱེད་རྣམས་ཀྱང་དེ་ཁོངས་བསྡུས།།

ལྔ་པ་(བདག་གཞན་ལས་ལོགས་སུ་དུས་གསུམ་དབྱེ་བའི་དགོས་པ་བཤད་པ་)ནི།

དེས་ན་དུས་གསུམ་དུ་དབྱེ་བ།།          བདག་གཞན་དབྱེ་བས་མ་ཁྱབ་པ།།

བསྡུ་བའི་དོན་དུ་ཤེས་དགོས་པར།།

དྲུག་པ་(བདག་དོན་ཕལ་པ་བཤད་པ་)ནི།

གསུངས་ཀྱང་སྔོན་འཇུག་འ་ཡིག་སྐབས།།         བྱེད་ལས་ཙམ་དང་འབྲེལ་བ་ཡི། །
དངོས་པོ་བདག་ལའང་འཇུག་པ་མཐོང་། །

བདག་དོན་ཕལ་པ་ངོ་སྤྲོད་ཀྱི་རེའུ་མིག

དཔེར་བརྗོད།	བདག	གཞན། ྾ ྾	ཟུར་བརྗོད།
ང་བོད་ལ་འགྲོ་གི་ཡིན་ཞེས་པ་ལྟ་བུ་ཞིག་ལ་མཚོན་ན།	(ང་)འགྲོ་བ་པོ་ཡིན་པས་བདག་ཙམ་གཞག་རྒྱུ་ཡོད།	བྱ་ཚིག་འདི་ལ་འགྲོ་ས་ལས་འགྲོ་རྒྱུའམ་འགྲོ་ཡས་ལོགས་སུ་གཞག་རྒྱུ་མེད་པས་གཞན་མེད།	དེར་བརྟེན་བདག་གཞན་གཉིས་ལས་དངོས་སུ་འགྱུར་བ་ལ་དེ་ལ་ལྟོས་ཏེ་གཞན་ཞིག་བཞག་རྒྱུ་ཡོད་དགོས་པ་ལ་བྱ་ཚིག་འདི་ལ་གཞག་རྒྱུ་མེད་པས་བདག་དོན་ཕལ་པར་དབྱངས་ཅན་གྲུབ་པའི་རྡོ་རྗེས་བཞེད་དོ།།

·       བདག་དོན་ཕལ་པ་འདི་དབྱངས་ཅན་གྲུབ་པའི་རྡོ་རྗེ་གསར་བཤད་ཙམ་དུ་མ་ཟད་དཀའ་གནད་ཅིག་ཀྱང་ཡིན།

·       བདག་དོན་ཕལ་པ་འདི་ངོས་འཛིན་གནང་པ་ནས་བཟུང་བྱེད་འབྲེལ་ལ་བདག་གཞན་གཉིས་ཙམ་དུ་མ་ཟད་ད་དུང་གཞན་གཞག་རྒྱུ་མེད་པའི་བདག་ཙམ་

གཉིས་པ་བྱེ་བྲག་ཏུ་སྔོན་འཇུག་སོ་སོའི་འཇུག་ཡུལ་བཤད་པ་(ལ་)གཉིས་ཏེ། རྟགས་འཇུག་གི་རྩ་བའི་དངོས་བསྟན་གྱི་འཇུག་ཡུལ་སྒྲུབ་ཕྱོགས་ནས་བཤད་པ་དང་། ཤུགས་བསྟན་མི་འཇུག་པའི་ཁྱབ་མཐའ་དགག་ཕྱོགས་ནས་བཤད་པ་གཉིས། དང་པོ་(རྟགས་འཇུག་གི་རྩ་བའི་དངོས་བསྟན་གྱི་འཇུག་ཡུལ་སྒྲུབ་ཕྱོགས་ནས་བཤད་པ་[18])ལ། ཕོ་ཡིག་གི་དགོས་པ་དང་། གཉིས་པ་མ་ནིང་ག་ད་གཉིས་ཀྱི་དགོས་པ་དང་། གསུམ་པ་མོ་འ་ཡིག་གི་དགོས་པ་དང་། བཞི་པ་ཤིན་ཏུ་མོ་མ་ཡིག་གི་དགོས་པ་བཤད་པ་དང་བཞི་(ལས་)།

(དང་པོ་ཕོ་ཡིག་གི་དགོས་པ་ནི།)

དེ་ལྟར་ངེས་ནས་ཕོ་ཡིག་བ།།            བསྒྲུབས་སོ་ལྟ་བུ་འདས་པ་དང་།།

བསྒྲུབ་བྱའི་ལྷ་དང་བསྒྲུབ་པར་བྱ།། ཞེས་སོགས་དངོས་པོ་གཞན་ལ་འཇུག།

·       ད་ལྟའི་ཚིགས་བཅད་ཤོ་ལོ་ཀ་གཅིག་པོ་དེ་ནི་རྟགས་ཀྱི་འཇུག་པའི་རྩ་བ་ལས། ཕོ་ནི་འདས་དང་གཞན་བསྒྲུབ་ཕྱིར།། ཞེས་པའི་འགྲེལ་པ་ཡིན།

·       མཚམས་འདི་ནས་དུས་གསུམ་སྤྱིའི་འདས་པ་དང་། བྱེ་བྲག་དང་ཐོར་བུའི་འདས་མ་འོངས་གཉིས་སྔོན་འཇུག་གཙོ་བོ་གང་ཡིན་མིན་ཀྱང་བསྟན་པ་ཡིན།

(གཉིས་པ་མ་ནིང་ག་ད་གཉིས་ཀྱི་དགོས་པ་དང་)

མ་ནིང་ག་ད་གཉིས་པོ་ནི། །             གཅོད་པ་པོ་དང་གཅོད་པར་བྱེད། །

གཅོད་པར་འགྱུར་དང་དཀྲི་བ་པོ། །       དཀྲི་བར་བྱེད་དང་དཀྲི་བར་འགྱུར། །

ཞེས་སོགས་དངོས་པོ་བདག་དོན་དང་། །   གཅད་བྱའི་ཤིང་དང་གཅད་པར་བྱ། །

དཀྲི་བྱའི་སྣལ་མ་དཀྲི་བར་བྱ། །         ཞེས་སོགས་དངོས་པོ་གཞན་དོན་དང་། །

གཅོད་བཞིན་པ་དང་དཀྲི་བཞིན་པ། །           ཞེས་སོགས་ད་ལྟ་བསྒྲུབ་ཆེད་འཇུག །

·       ད་ལྟའི་ཚིགས་བཅད་ཤོ་ལོ་ཀ་གཉིས་དང་ཕྱེད་ཀ་དེ་ནི་རྟགས་ཀྱི་འཇུག་པའི་རྩ་བ་ལས། མ་ནིང་གཉིས་ཀ་ད་ལྟར་ཆེད།། ཅེས་པའི་འགྲེལ་པ་ཡིན།

·       མཚམས་འདི་ནས་དུས་གསུམ་སྤྱིའི་མ་འོངས་ད་ལྟ་དང་། སྤྱི་ཆ་འདྲའི་མ་འོངས་ད་ལྟ་གཉིས་བཅས་ཀྱི་སྔོན་འཇུག་གཙོ་བོ་གང་ཡིན་མིན་ཀྱང་བསྟན་པ་ཡིན།

(གསུམ་པ་མོ་འ་ཡིག་གི་དགོས་པ་ནི)

མོ་ཡིག་འ་ནི་འཆད་པ་པོ། །                  འཆད་པར་བྱེད་དང་འཆད་པར་འགྱུར། །

ཞེས་སོགས་དངོས་པོ་བདག་དངོས་དང་། །  འགྲོ་བ་པོ་དང་འགྲོ་བར་བྱེད། །

ཅེས་སོགས་བདག་དོན་ཕལ་པ་དང་། །          འཁྱིལ་ལོ་ཞེས་སོགས་ད་ལྟ་དང་། །

འཁྱིལ་བར་འགྱུར་སོགས་མ་འོངས་འཇུག །

·       ད་ལྟའི་ཚིགས་བཅད་ཤོ་ལོ་ཀ་གཅིག་དང་རྐང་པ་གསུམ་གྱིས་རྟགས་ཀྱི་འཇུག་པའི་རྩ་བ་ལས། མོ་ནི་བདག་ད་མ་འོངས་ཕྱིར།། ཞེས་པའི་འགྲེལ་པ་ཡིན།

·       མཚམས་འདི་ནས་དུས་གསུམ་སྤྱིའི་ད་ལྟ་བ་དང་། ཐོར་བུའི་ད་ལྟ་བ། ཁྱབ་མཉམ་ཆ་འདྲའི་ད་ལྟ་བ་དང་མ་འོངས་པ། སྤྱིའི་ཆ་འདྲའི་ད་ལྟ་བ། ཐོར་བུ་ཆ་འདྲའི་ད་ལྟ་བ་བཅས་ཀྱི་སྔོན་འཇུག་གཙོ་བོ་གང་ཡིན་མིན་ཀྱང་བསྟན་པ་ཡིན།

(བཞི་པ་ཤིན་ཏུ་མོ་མ་ཡིག་གི་དགོས་པ་བཤད་པ་ནི།)

ཤིན་ཏུ་མོ་ཡི་མ་ཡིག་ནི། །       བདག་གཞན་དུས་གསུམ་མཉམ་པར་འཇུག །

·       ད་ལྟའི་ཚིགས་བཅད་རྐང་པ་གཉིས་པོས་རྟགས་ཀྱི་འཇུག་པའི་རྩ་བ་ལས། ཤིན་ཏུ་མོ་ནི་མཉམ་ཕྱིར་རོ།། ཞེས་པའི་འགྲེལ་པ་ཡིན།

·       མཚམས་འདི་ནས་དུས་གསུམ་ཁྱབ་མཉམ་གྱི་དུས་གསུམ་གྱི་དག་ཆ་གཙོ་བོ་གང་ཡིན་མིན་བསྟན་པ་ཡིན།

གཉིས་པ་ཤུགས་བསྟན་མི་འཇུག་པའི་ཁྱབ་མཐའ་དགག་ཕྱོགས་ནས་བཤད་པ། རྟགས་འཇུག་རྩ་བར་མོ་འ་ཡིག་འདས་པ་ལ་མི་འཇུག་པར་བཤད་པའི་རྒྱུ་མཚན་དང་། མ་ནིང་ག་ད་གཉིས་འདས་པ་ལ་མི་འཇུག་པ་བཤད་པའི་རྒྱུ་མཚན་དང་། ཕོ་བ་ཡིག་བདག་གམ་ད་ལྟ་བ་ལ་མི་འཇུག་པ་གསུངས་པའི་རྒྱུ་མཚན་དང་གསུམ་མོ།།

དང་པོ་(རྟགས་འཇུག་རྩ་བར་མོ་འ་ཡིག་འདས་པ་ལ་མི་འཇུག་པར་བཤད་པའི་རྒྱུ་མཚན་)ནི།

འོན་ཀྱང་བྱེད་པོ་གཞན་དངོས་དང་།།      འབྲེལ་བའི་འདས་ལ་འའི་སྔོན་འཇུག།

མེད་པར་ངེས་ཤིང་༌༌༌༌༌༌༌༌༌༌༌༌༌༌

·        མཚམས་འདིར་དབྱངས་ཅན་གྲུབ་པའི་རྡོ་རྗེས་བྱེད་འབྲེལ་ལས་ཚིག་གི་འདས་པ་ལ་སྔོན་འཇུག་མེད་པར་ངེས་པ་གསུངས་ཀྱང་། དཔེར་ན་རྗེས་སུ་འབྲངས་ལྟ་བུའི་བྱ་ཚིག་འདི་བྱེད་འབྲེལ་ཡིན་པ་གང་ཞིག་འདས་པ་ལ་འ་སྔོན་འཇུག་པར་བརྟེན་གཅིག་ཏུ་བྱེད་འབྲེལ་ལས་ཚིག་གི་འདས་པ་ལ་འ་སྔོན་མེད་པར་མི་ངེས་སོ་སྙམ།

གཉིས་པ་(མ་ནིང་ག་ད་གཉིས་འདས་པ་ལ་མི་འཇུག་པ་བཤད་པའི་རྒྱུ་མཚན)ནི།

༌༌༌༌༌༌༌༌༌༌༌༌༌༌༌༌༌༌༌ག་ད་ཉུང་།།     

གསུམ་པ་(ཕོ་བ་ཡིག་བདག་གམ་ད་ལྟ་བ་ལ་མི་འཇུག་པ་གསུངས་པའི་རྒྱུ་མཚན་)ནི།

ད་ལྟ་བ་ལ་བའི་སྔོན་འཇུག།            ཉུང་ཞིང་མགོ་ཅན་ད་ལྟ་བར།།

བས་འཕུལ་མེད་པར་ངེས་པ་ཙམ།།       གཞན་ཡང་བས་འཕུལ་ཅན་ཕལ་ཆེར།།

བྱེད་པ་པོ་ནི་ད་ལྟ་དང་།།              བྱ་ཡུལ་མ་འོངས་པར་བསྡུས་ནས།།

(དུས་གསུམ་བྱེ་བྲག་གི་མཚན་ཉིད།)

འདས་ལ་བས་འཕུལ་ཡང་འཇུག་ཡོད།།         ད་ལྟ་བ་ལ་གཉིས་ཀ་མེད།།   

མ་འོངས་འཕུལ་ཡོད་ཡང་འཇུག་མེད།།          སྐུལ་ཚིག་འཕུལ་མེད་ཡང་འཇུག་ཡོད།།

·        དུས་གསུམ་བྱེ་བྲག་ཙམ་ལས་གཞན་བདག་གི་མཚན་ཉིད་འདིར་མ་གསུངས་པའི་རྒྱུ་མཚན་གང་ཞེ་ན། ཕལ་ཆེར་བོད་པའི་བྱ་ཚིག་གི་ཁྲོད་དུ་བྱེ་བྲག་རིགས་གཏོགས་མང་བའི་རྒྱུ་མཚན་གྱིས་འདིར་གསུངས་པར་སེམས་སོ།།

(སྤྱིར་བཏང་འགའ་ཞིག་གི་འདས་པ་སྒྲུབ་བྱེད་ས་ཙམ་གྱིས་འཐུས་པར་བསྟན་པ།)

སྐབས་འགར་འདས་དང་སྐུལ་ཚིག་ལ།།          ས་རྐྱང་སྦྱར་བས་འཐུས་པའང་ཡོད། །

·        མཚམས་འདིར་སློབ་དཔོན་གྱིས་ སྤྱིར་བཏང་འགའ་ཞིག་གི་འདས་པ་སྒྲུབ་བྱེད་ས་རྐྱང་གིས་འཐུས་པར་བསྟན་ཀྱང་མ་ཁྱབ་པ་སེམས་ཏེ། བསྐྱེད་ལྟ་བུའི་བྱ་ཚིག་དག་ལ་དས་ཀྱང་འདས་པར་གྲུབ་པ་མཐོང་བའི་ཕྱིར་རོ།།

གསུམ་པ་རྗེས་འཇུག་གི་རྟགས་ཀྱི་འཇུག་པ་བཤད་པ་ལ་གཉིས། རྗེས་འཇུག་རྟགས་ཀྱི་དབྱེ་བ་བཤད་པ་དང་། རྗེས་འཇུག་རྟགས་ཀྱི་འཇུག་ཚུལ་བཤད་པའོ།། དང་པོ་(རྗེས་འཇུག་རྟགས་ཀྱི་དབྱེ་བ་བཤད་པ་)ནི།

རྗེས་འཇུག་ཡི་གེ་བཅུ་པོ་ཡི།།      ག་ད་བ་ས་བཞི་རྣམས་ཕོ།།

ང་མ་འ་གསུམ་མོ་ཡིན་ཅིང་།།     ན་ར་ལ་གསུམ་མ་ནིང་སྟེ།།[19]

·        སྤྱིར་སི་ཏུའི་སྔ་རོལ་དུ་རྗེས་འཇུག་གི་རྟགས་བཞེད་ཚུལ་ལ་མི་འདྲ་བ་གང་འཚམས་ཡོད་ཀྱང་། ད་ལྟ་སློབ་དཔོན་གྱིས་རྟགས་ཀྱི་བཞེད་པ་འདི་ནི་སི་ཏུའི་བཞེད་པ་གཞིར་བཟུང་བཀོད་པའོ།།

·        རྟགས་ཀྱི་འཇུག་པ་ལས་རྟགས་སོ་སོའི་ཡི་གེ་ངོས་འཛིན་མ་མཛད་པ་དེ་འདིར་ཁ་གསལ་མཛད་པའི་ཁྱད་པར་ཡོད།

གཉིས་པ་(རྗེས་འཇུག་རྟགས་ཀྱི་འཇུག་ཚུལ་བཤད་པ་)ལ་གསུམ། གང་ལ་འཇུག་པ་བཤད་པ་དང་། ཇི་ལྟར་འཇུག་པ་བཤད་པ་དང་། ཅི་ཕྱིར་འཇུག་པ་བཤད་པའོ།། དང་པོ་(གང་ལ་འཇུག་པ་བཤད་པ་)ནི།

མིང་གཞིའི་ཡི་གེ་ཀུན་ལ་འཇུག།[20]

·        མིང་གཞི་ཞེས་པ་གང་ལ་གོ་དགོས་སམ་ཞེ་ན། སྤྱིར་མིང་གཞི་ཞེས་པའི་གོ་ཡུལ་མི་འདྲ་བ་གསུམ་ཡོད་དེ། དབྱངས་གསལ་གཉིས་ལ་མིང་གཞི་དང་། གསལ་བྱེད་ཁོ་ན་ལ་མིང་གཞི། རྗེས་འཇུག་བཅུ་ཕར་ཕུད་པའི་ལྷག་མ་ཉི་ཤུ་བཅས་གསུམ་མོ།། སྐབས་འདིར་བསྟན་གྱི་མིང་གཞི་ནི་སྒྲ་དོག་པའི་དབང་དུ་བཏང་ན་གསལ་བྱེད་ཙམ་ལ་གོ་དགོས་པར་ལྟར་སྣང་རུང་། ཡངས་པའི་དབང་དུ་དེ་གསུམ་ག་བཞག་ཀྱང་མི་འཐད་པ་ཅང་མ་མཐོང་ངོ།།

·        རྟགས་ཀྱི་འཇུག་པ་གང་ལ་དང་། གང་གིས་འཇུག་པའི་ས་བཅད་གཉིས་སུ་བཀྲལ་ཡང་འདིར་གང་ལ་འཇུག་ཙམ་གྱིས་འཐུས་པར་བྱས་སོ།།

གཉིས་པ་(ཇི་ལྟར་འཇུག་པ་བཤད་པ་)ལ་གཉིས། སྒྲའི་འཇུག་ཚུལ་དང་། དོན་གྱི་འཇུག་ཚུལ་ལོ།། དང་པོ་(སྒྲའི་འཇུག་ཚུལ་)ནི།

(ཇི་ལྟར་འཇུག་ཚུལ་སྒྲ་དོན་གྱི་འཇུག་ཚུལ་གཉིས་སུ་ཡོད་པར་ཁས་བླངས་པ།)

ཇི་ལྟར་འཇུག་ཚུལ་གཉིས་ཡིན་ཏེ།།   

(གཉིས་ལས་དང་པོ་སྒྲའི་འཇུག་ཚུལ་དངོས་བཤད་པ།)

   དང་པོ་སྒྲ་ཡི་འཇུག་ཚུལ་ནི།།        

(དང་པོ་སྐྱེས་བུ་རབ།)

ཕོ་ཡི་ག་ཡིག་ཡང་འཇུག་ཅན།།       སྐྱེས་བུ་རབ་དང་༌༌༌༌༌༌༌༌༌

(གཉིས་པ་སྐྱེས་བུ་འབྲིང་།)       ༌༌༌༌༌༌༌༌༌༌༌༌༌༌༌༌༌༌༌༌༌༌༌ཕོ་ཡིག་བ།།          ཡང་འཇུག་ཅན་ནི་སྐྱེས་བུ་འབྲིང་།།

(གསུམ་པ་སྐྱེས་བུ་ཐ་མ།) ག་བ་ཡང་འཇུག་མེད་པ་དང་།།       ད་སའི་མཐའ་ཅན་ཐ་མ་སྟེ།།

དྲག་པ་ཕོ་ལའང་ནང་གསེས་ཀྱིས།།           དྲག་ཞན་བར་མ་གསུམ་དུ་དབྱེ།།     

དེ་བཞིན་ཞན་པ་མོ་ལ་ཡང་།།        ནང་གསེས་དྲག་ཞན་གཉིས་དབྱེ་སྟེ།།

(དང་པོ་མོ་ཙམ།)       ང་མ་ཡང་འཇུག་ཅན་མོ་དང་།།      

(གཉིས་པ་ཤིན་ཏུ་མོ།)   ང་མ་ཡང་འཇུག་མེད་པ་དང་།།       འ་མཐའ་ཅན་རྣམས་ཤིན་ཏུ་མོ།།     

བར་མ་མ་ནིང་ན་ར་ལ།།           

(དང་པོ་འགྱུར་བ་མ་ནིང་།)      ཡང་འཇུག་ཡོད་དམ་མེད་ཀྱང་རུང་།།  མིང་གཞི་ཕོ་ཡིག་མཐར་ཡོད་དང་།།

མིང་གཞི་མ་ནིང་རྗེས་སུ་ནི།།         ཡང་འཇུག་དང་བཅས་ཞུགས་པ་ན།།

དྲག་དང་ཕྲད་པས་དྲག་པར་འགྱུར།།   མིང་གཞི་མོ་ཡིག་རྗེས་སུ་ནི།།

ཡང་འཇུག་མེད་པར་ཞུགས་པ་ན།།          ཞན་དང་འཕྲད་པས་ཞན་པར་འགྱུར།།

དེ་གཉིས་འགྱུར་བ་མ་ནིང་ཡིན།།     

(གཉིས་པ་མཚན་གཉིས་མ་ནིང་།)

མིང་གཞི་མོ་ཡིག་རྗེས་སུ་ནི།།         ཡང་འཇུག་དང་བཅས་ཞུགས་པ་ན།།

དྲག་ཞན་གཉིས་ཀའི་ཆ་ལྡན་ཕྱིར།།          མཚན་གཉིས་མ་ནིང་ཞེས་སུ་གྲགས།།

(གཉིས་པ་མཚན་མེད་མ་ནིང་།)

མིང་གཞི་མ་ནིང་རྗེས་སུ་ནི།།         ཡང་འཇུག་མེད་པར་ཞུགས་པ་ན།།   

དྲག་གཞན་གང་དུའང་མི་འགྱུར་བས།། མཚན་མེད་མ་ནིང་ཞེས་སུ་འདོད།།

·        དབྱངས་ཅན་གྲུབ་པའི་རྡོ་རྗེའི་འགྱུར་བ་མ་ནིང་དང་། མཚན་མེད་མ་ནིང་གི་བཞེད་ཚུལ་གཉིས་ཀྱི་སྐབས་སུ་སི་ཏུ་དང་ཅུང་ཟད་མི་འདྲ།

ས་འཇུག་ནང་གསེས་རྟགས་བརྒྱད་ངོ་སྤྲོད་ཀྱི་རེའུ་མིག

སྤྱི་རྟགས།	ནང་གསེས་རྟགས།	རྗེས་འཇུག			དཔེར་བརྗོད།
ཕོ།	སྐྱེས་བུ་རབ།	ག	ཡང་འཇུག་ཅན།		ལགས།
	འབྲིང་།	བ	ཡང་འཇུག་ཅན།		བསླབས།
	ཐ་མ།	ག	ཡང་འཇུག་མེད་པ།		དག
		བ			ལབ།
		ད།	མཐའ་ཅན།		དད།
		ས			ལས།
མོ།	མོ་ཙམ།	ང་།	ཡང་འཇུག་ཅན།		ཟངས།
		མ།	ཡང་འཇུག་ཅན།		བསམས།
	ཤིན་ཏུ་མོ།	ང་།	ཡང་འཇུག་མེད་པ།		དང་།
		མ།			དམ།
		འ	མཐའ་ཅན།		མཐའ།
མ་ནིང་།	འགྱུར་བ་མ་ནིང་།	ན་ར་ལ།	དྲག་འཕྲད་དྲག་འགྱུར།	མིང་གཞི་ཕོ་ཡིག་གི་རྗེས་སུ་ཡང་འཇུག་ཞུགས་མིན་ཁྱད་མེད་པར་གྱུར་བས་དྲག་ཕྲད་དྲག་འགྱུར།	དཀོན། དཀར། སྐལ།	ཀུནད།
				མིང་གཞི་མ་ནིང་གི་རྗེས་སུ་ཡང་འཇུག་དང་བཅས་ཏེ་ཞུགས་ན་ཡང་དྲག་འཕྲད་དྲག་འགྱུར།	མཁྱེནད།
		ན་ར་ལ།	ཞན་འཕྲད་ཞན་འགྱུར།	མིང་གཞི་མོ་ཡིག་རྗེས་སུ་ཡང་འཇུག་མེད་པར་ཞུགས་པ།	དགོན།
	མཚན་གཉིས་མ་ནིང་།	ན་ར་ལ།	མིང་གཞི་མོ་ཡིག་གི་རྗེས་སུ་ཡང་འཇུག་དང་བཅས་པར་ཞུགས་པ།		བརྒྱནད། འཛིནད།
	མཚན་མེད་མ་ནིང་།	ན་ར་ལ་།	མིང་གཞི་མ་ནིང་རྗེས་སུ་ཡང་འཇུག་མེད་པར་ཞུགས་པ།		ཐར།

གཉིས་པ་དོན་གྱི་འཇུག་ཚུལ་ལ་གཉིས། སྔ་མ་གང་ལྟར་འགྱུར་བ་བཤད་པ་དང་། ཕྱི་མ་གང་ལྟར་འགྱུར་བ་བཤད་པའོ།། དང་པོ་(སྔ་མ་གང་ལྟར་འགྱུར་བ་བཤད་པ་)ནི།

གཉིས་པ་དོན་ལ་གཉིས་[21]ཡོད་པའི།།      སྔ་མ་གང་ལྟར་འགྱུར་བ་ནི།།

(སྔ་མ་གང་ལྟར་འགྱུར་བའི་གཞུང་དངོས།)

རྗེས་འཇུག་གང་ལ་ཞུགས་པ་ཡི།།   མིང་དེས་བདག་གཞན་སོགས་གང་སྟོན།།

ཕལ་ཆེར་མིང་དེའི་སྔོན་འཇུག་གི།  ནུས་པར་སྦྱར་ནས་རྟོགས་པར་བྱ།།

·        རྟགས་ཀྱི་འཇུག་པའི་གཞུང་། སྔ་མ་སྔོན་འཇུག་སྔ་བཞིན་སྦྱར།། ཞེས་པའི་འགྲེལ་པ་ཡིན།

·        མཚམས་འདི་ནས་རྟོགས་དགོས་པ་ཞིག་ནི། མིང་མཐའ་སྔ་མ་རྗེས་འཇུག་འདི་ཉིད་སྔོན་འཇུག་བཞིན་རང་སྟོབས་ཀྱིས་བདག་གཞན་དུས་གསུམ་གསལ་བར་སྟོན་མི་ཐུབ་ཀྱང་གཅིག་ཏུ་སྟོན་མི་ཐུབ་པའི་དོན་མ་ཡིན།

གཉིས་པ་(ཕྱི་མ་གང་ལྟར་འགྱུར་བ་བཤད་པ་)ལ་གཉིས། མིང་མཐའ་འདྲེན་ཚུལ་དང་། རྣམ་དབྱེ་ཕྲད་བཅས་འདྲེན་ཚུལ་ལོ།། དང་པོ་(མིང་མཐའ་འདྲེན་ཚུལ་)ནི།

ཕྱི་མ་ཇི་ལྟར་འགྱུར་བ་ནི།།            

(རྟགས་མཚུངས་འདྲེན་པ།)

རྗེས་འཇུག་ཕོ་ཡིས་ཕོ་ཡིག་གི།           མིང་མཐའ་གཞན་དྲངས་དེ་བཞིན་དུ།། 

མོ་ཡིས་མོ་ཡི་མིང་མཐའ་དང་།།   མ་ནིང་གིས་ནི་མ་ནིང་དྲངས།།       

དེ་རྣམས་རྟགས་མཚུངས་འདྲེན་ཚུལ་ཏེ།།

(བརྗོད་བདེ་འདྲེན་པ།)

བརྗོད་བདེ་འདྲེན་པའང་ཤིན་ཏུ་མང་།།[22]

·        རྟགས་མཚུངས་དང་བརྗོད་བདེ་གཉིས་ལས་སི་ཏུས་བརྗོད་བདེ་ཉིད་གཙོ་ཆེ་བར་གསུངས།

གཉིས་པ་རྣམ་དབྱེ་ཕྲད་བཅས་འདྲེན་ཚུལ་ལ་གཉིས། སྤྱིར་འདྲེན་ཚུལ་དང་། ནང་གསེས་འཇུག་ཚུལ་ལོ།། དང་པོ་(སྤྱིར་འདྲེན་ཚུལ་)ནི།

གཞན་ཡང་མིང་མཐའ་དེ་ཉིད་ཀྱིས།།      རྟགས་མཚུངས་པའམ་སྒྲ་མཐུན་པའི[23]།།

རྣམ་དབྱེ་བརྒྱད་དང་སླར་བསྡུ་སོགས།།    སྔ་མའི་[24]ཤུགས་དང་མཐུན་པར་འདྲེན།།

གཉིས་པ་(ནང་གསེས་འཇུག་ཚུལ་)ལ་གཉིས། མདོར་བསྟན་དང་། རྒྱས་བཤད་དོ།། དང་པོ་(མདོར་བསྟན་)ནི།

དེ་དག་ནང་གསེས་གང་འཇུག་ནི།།  རྣམ་དབྱེའམ་ཕྲད་བཅས་མིང་ཚིག་དེའི།།

མཐར་སྦྱར་མིང་དོན་ལས་ཤེས་བྱ།།

གཉིས་པ་རྒྱས་བཤད་ལ་གཉིས། རྣམ་དབྱེའི་ནང་གསེས་གང་ཞིག་འཇུག་པ་དང་། ཕྲད་ཀྱི་ནང་གསེས་གང་ཞིག་འཇུག་པ་བཤད་པའོ།། དང་པོ་(རྣམ་དབྱེའི་ནང་གསེས་གང་ཞིག་འཇུག་པ་)ནི།

(རྣམ་དབྱེ་དང་པོ།)  དེ་ཡང་ཆོས་རྣམས་ངོ་བོ་ཙམ།།    བརྗོད་པ་རྣམ་དབྱེ་དང་པོ་སྟེ།།

དཔེར་ན་བུམ་པ་ཀ་བ་བཞིན།།          གསལ་བྱེད་བོད་ཀྱི་སྐད་ལ་ཉུང་།།

(རྣམ་དབྱེ་གཉིས་པ།) ལས་དང་བྱ་ཡུལ་དོན་གཅིག་སྟེ།།   དེ་ལྟའི་བྱ་བའི་ཡུལ་ཞིག་ལ།།

བྱ་བ་བྱས་པར་སྟོན་པ་ལ།།       གཉིས་པ་ལས་སུ་བྱ་བ་དང་།།

(ཕན་ཚུན་ནོར་ཉན།) གཉིས་པའི་ནང་ཚན་དེ་ཉིད་དང་།། བཞི་པ་དགོས་ཆེད་གསུམ་འདྲ་ཡང་།།

(གཉིས་པའི་ཁྱད་ཆོས།)  བྱ་བ་བྱས་པས་བྱ་བའི་ཡུལ།།         དེ་འམ་དེ་དང་འབྲེལ་བ་ལ།།

ཕན་ཐོགས་མེད་ན་གཉིས་པ་སྟེ།།   དཔེར་ན་ཤར་དུ་འགྲོ་ལྟ་བུ།།

(བཞི་པའི་ཁྱད་ཆོས།) ཕན་ཐོགས་ཡོད་ན་བཞི་པ་སྟེ།།           དཔེར་ན་སློང་ལ་སྦྱིན་ལྟ་བུ།།

(དེ་ཉིད་ཀྱི་ཁྱས་ཆོས།)   ཕན་ཐོགས་མེད་ཀྱང་བྱ་ཡུལ་དང་།།    བྱ་བ་ངོ་བོ་གཅིག་ཡིན་ན།།

གཉིས་པའི་ནང་ཚན་དེ་ཉིད་དེ།།   དཔེར་ན་ལྷ་རུ་གསལ་ལྟ་བུ།།

(བདུན་པའི་ངོས་འཛིན།) གང་ཞིག་གང་ལ་བརྟེན་པའམ།། གནས་དང་ཡོད་པའི་དོན་ཙམ་ལས།།

བྱ་བ་གཏན་ནས་མི་བྱེད་ན།།            རྣམ་དབྱེ་བདུན་པ་གནས་གཞི་སྟེ།།

དཔེར་ན་སྟེང་དུ་མི་ཡོད་ལྟར།།   

(ཚེ་སྐབས་ངོས་འཛིན།)   ཚེ་སྐབས་གཉིས་དང་དོན་འདྲ་ན།།     བདུན་པའི་ནང་ཚན་ཚེ་སྐབས་ཏེ།།    

               དཔེར་ན་མཆུ་ཟླ་ཤར་བ་ན།།            ཆོ་འཕྲུལ་དུས་ཆེན་ཚུགས་ལྟ་བུ།།     

(ལ་དོན་གྱི་འཇུག་ཡུལ)  རྣམ་དབྱེ་གཉིས་བཞི་བདུན་པ་དང་།།  དེ་ཉིད་ཚེ་སྐབས་གསལ་བྱེད་སྒྲ།།     

               སུ་ར་རུ་དུ་ན་ལ་ཏུ།།                  ཡིན་ཞིང་༌༌༌༌༌༌༌༌༌༌༌

(ལ་དོན་ཞེས་བཏགས་དོན།)ཕལ་ཆེར་ལ་སྒྲ་དང་།།       མཐུན་པས་ལ་དོན་རྣམ་དབྱེའང་ཟེར།།

(ན་ལ་མི་འཇུག་ས།)  འོན་ཀྱང་ན་ལ་དེ་ཉིད་ལ།།        མི་འཇུག་སྨྲ་བའི་སྒོ་ལས་གསུངས།།

(རྣམ་དབྱེ་གསུམ་པ།) རྣམ་དབྱེ་གང་ལ་སྦྱོར་ཡུལ་དེས།།   ཉེ་འགྱངས་གང་དུ་བྱ་བ་ཞིག།

བྱས་ན་གསུམ་པ་བྱེད་སྒྲ་སྟེ།།            དཔེར་ན་བདག་གིས་བཤད་ལྟ་བུ།།

(རྣམ་དབྱེ་དྲུག་པ།)  བྱ་བ་གཏན་ནས་མི་བྱེད་པར།།          སྔ་ཕྱི་འབྲེལ་བྱེད་ཙམ་སྟོན་ན།།

རྣམ་དབྱེ་དྲུག་པ་འབྲེལ་སྒྲ་སྟེ།།          དཔེར་ན་བདག་གི་མིག་ལྟ་བུ།།

(གསུམ་དྲུག་གཉིས་ཀྱི་ཕྲད་ངོས་འཛིན།)                       

རྣམ་དབྱེ་གསུམ་དྲུག་གསལ་བྱེད་སྒྲ།།      ས་མཐའ་ཡོད་དང་མེད་པ་ཡི།།

གི་ཀྱི་གྱི་འི་ཡི་ལྔ་ཡིན།།         

(རྣམ་དབྱེ་ལྔ་པ།)    གང་ཞིག་གང་ལས་བྱུང་བའམ།།    བྱེ་དང་ལྷུང་བའི་དོན་ལྡན་ན།། 

               རྣམ་དབྱེ་ལྔ་པ་འབྱུང་ཁུངས་ཏེ།།   དཔེར་ན་ཞལ་ནས་ཐོས་ལྟ་བུ།།       

(འབྱུང་ཁུངས་ཀྱི་ཕྲད།)   གསལ་བྱེད་སྒྲ་ནི་ནས་ལས་ཏེ།།

(ལྔ་པའི་ནང་གསེས།) དགར་དང་སྡུད་པའང་ལྔ་པར་གཏོགས།།

གཉིས་པ་(ཕྲད་ཀྱི་ནང་གསེས་གང་ཞིག་འཇུག་པ་བཤད་པ་)ནི།

(སྡུད་སྒྲ་ངོས་འཛིན) གཞན་ཡང་ཚིག་དོན་གོང་འོག་ཏུ།། བསྡུ་རྒྱུ་ཡོད་ན་སྡུད་པའི་སྒྲ།།

དང་དང་ཀྱང་ཡང་འང་སོགས་སྦྱོར།།     

(བྱེད་སྡུད།)        རྣམ་གྲངས་དུ་མས་དོན་བསྐྱར་ན།། འབྱེད་སྡུད་སྒྲ་འཇུག་༌༌༌༌༌༌༌༌༌༌༌༌

(དགག་སྒྲ་དང་བདག་སྒྲ།) ༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌དགག་པ་དང་།།  བདག་དོན་ཡོད་ན་ཐོག་མཐའ་རུ།།    

པ་སྡེའི་རྟགས་རྣམས་ཅི་རིགས་འཇུག།    

(རྒྱན།)            རྒྱན་དུ་གྱུར་པའི་ཚིག་ཕྲད་ཀྱང་།།  དོན་ལ་བསྙེགས་པ་ཡོད་ན་སྦྱོར།།     

(ལྷག་བཅས།)       དེ་བཞིན་བསྟན་བྱ་ལྷག་ཡོད་ན།།   ལྷག་བཅས་སྒྲ་སྦྱོར་༌༌༌༌༌༌༌   

(རྫོགས་ཚིག)       ༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌ཚིག་དོན་ནི།།    རྫོགས་ན་སླར་བསྡུའི་སྒྲ་རྣམས་སྦྱོར།།

གསུམ་པ་ཅི་ཕྱིར་འཇུག་བཤད་པ་ལ་གཉིས། རྗེས་འཇུག་གི་དགོས་པ་དངོས་བཤད་པ་དང་། ཞར་བྱུང་ཡི་གེའི་འཇུག་པ་སྤྱིའི་དགོས་པ་བཤད་པའོ།། དང་པོ་(རྗེས་འཇུག་གི་དགོས་པ་དངོས་བཤད་པ་)ནི།

   དགོས་པ་ཅི་ཕྱིར་འཇུག་ཅེ་ན།།         

(དབྱངས་ལྔ་བཞེད་ན་འཐད་ཚུལ།)

མོ་ཡིག་དབྱངས་དང་མི་ལྡན་ན།།   ཕོ་ཡིག་གསལ་བྱེད་བརྗོད་མི་ནུས།།   

དེ་ཕྱིར་དབྱངས་ལྔར་བཞེད་པ་བདེ།།

·        དབྱངས་ཅན་གྲུབ་པའི་རྡོ་རྗེས་དབྱངས་ལྔ་བཞེད་པ་སི་ཏུ་གོང་གི་མཁས་དང་གཅིག་མཚུངས་སུ་བཞེད་ཡོད་མིན་ད་དུང་བསམ་གཞིག་བྱ་དགོས་པར་མཐོང་།

(རྗེས་འཇུག་ཞུགས་པའི་དགོས་པ་དངོས།)

ཕོ་ཡིག་དབྱངས་ལྡན་དེ་དག་ལའང་།།           རྗེས་འཇུག་བཅུ་པོ་མ་ཞུགས་ན།།

དོན་གྱི་ངོ་བོ་ཙམ་སྟོན་པའི།།                  མིང་དང་དོན་གྱི་ཁྱད་པར་རྣམས།།

སྟོན་པའི་ཚིག་དང་དོན་ལྡན་པའི།།        ངག་གི་བརྗོད་པ་ཡོད་མིན་ཏེ།།

ཡི་གེའི་ཁོངས་ནས་མིང་དབྱུང་ཞིང་།།            མིང་གི་ཁོངས་ནས་ཚིག་ཕྱུང་ནས།།

ཚིག་གིས་དོན་རྣམས་སྟོན་པས་སོ།།

གཉིས་པ་(ཞར་བྱུང་ཡི་གེའི་འཇུག་པ་སྤྱིའི་དགོས་པ་བཤད་པ་)ལ་གཉིས། ཡི་གེའི་འཇུག་པ་རྣམས་ཀྱི་རང་བཞིན་གྱི་དགོས་པ་ལྡོག་ཕྱོགས་ནས་བཤད་པ་དང་། ཡི་གེའི་སྦྱོར་བ་སྟོན་པའི་བསྟན་བཅོས་འདི་ཇི་ལྟར་རྩོམ་ཚུལ་ལོ།། དང་པོ་(ཡི་གེའི་འཇུག་པ་རྣམས་ཀྱི་རང་བཞིན་གྱི་དགོས་པ་ལྡོག་ཕྱོགས་ནས་བཤད་པ་)ནི།

མིང་ཚིག་བརྗོད་པ་མེད་ན་ནི།།          ཐུན་མོང་ཐུན་མོང་མ་ཡིན་པའི།།

ཤེས་བྱ་སྟོན་པའང་མེད་པར་འགྱུར།།

གཉིས་པ་(ཡི་གེའི་སྦྱོར་བ་སྟོན་པའི་བསྟན་བཅོས་འདི་ཇི་ལྟར་རྩོམ་ཚུལ་)ལ་གཉིས། དངོས་དང་། དེ་༌༌གྲུབ་(འགྲུབ་)པ་སྨོན་པའོ།། དང་པོ་(དངོས་)ནི།

དེ་ཕྱིར་འཕགས་ཡུལ་མཁས་རྣམས་ཀྱི།།          རྗེས་སུ་འབྲངས་ནས་གསུངས་པ་འདི།།

གཉིས་པ་(དེ་༌༌གྲུབ་(འགྲུབ་)པ་སྨོན་པ)ནི།

སྐྱེ་བོ་ཀུན་གྱིས་རྟོགས་གྱུར་ཅིག།

རྩ་བའི་ས་བཅད་གསུམ་པ་འཇུག་གི་དོན་ལ་ལྔ། སྤྱིར་བརྡ་སྤྲོད་པའི་གཞུང་ལ་སློབ་གཉེར་བྱ་རིགས་པ་གལ་པོ་ཆེར་གདམས་པ་དང་། ཉན་པར་བསྐུལ་བ་དང་། བཟོད་པར་གསོལ་བ་དང་། དགེ་བ་བསྔོ་བ་དང་། མཛད་བྱང་ངོ་།། དང་པོ་(སྤྱིར་བརྡ་སྤྲོད་པའི་གཞུང་ལ་སློབ་གཉེར་བྱ་རིགས་པ་གལ་པོ་ཆེར་གདམས་པ་)ལ་གསུམ། བརྗོད་བྱའི་དོན་རྣམས་བརྗོད་བྱེད་སྒྲ་ལ་བརྟེན་དགོས་པར་བཤད་པ་དང་། མཁས་རྨོངས་སྒྲ་ཤེས་དང་ཤེས་མིན་གྱི་རྗེས་སུ་འགྲོ་ལྡོག་བྱེད་པ། མ་སྦྱངས་པའི་ཉེས་དམིགས་བཤད་པའོ།།

དང་པོ་(བརྗོད་བྱའི་དོན་རྣམས་བརྗོད་བྱེད་སྒྲ་ལ་བརྟེན་དགོས་པར་བཤད་པ་)ནི།

ཚིག་གི་སྒྲ་ཙམ་འདྲ་ན་ཡང་།།           དོན་ལ་ཁྱད་པར་ཤིན་ཏུ་ཆེ།།

དེ་ཕྱིར་བརྡ་དག་ལ་བརྟེན་ནས།།   མ་ནོར་དོན་རྣམས་འཚོལ་བ་གཅེས།།

གཉིས་པ་(མཁས་རྨོངས་སྒྲ་ཤེས་དང་ཤེས་མིན་གྱི་རྗེས་སུ་འགྲོ་ལྡོག་བྱེད་པ་)ནི།

དོན་ལ་མི་རྨོངས་རྨོངས་པ་ཡང་།།  ལུགས་འདིར་མཁས་མིན་གྱིས་བྱེད་དེ།།

སྒྲ་ཤེས་དོན་ལ་མི་རྨོངས་ཞེས།།          མཁས་པའི་གསུང་ལ་ཡོངས་སུ་གྲགས།།

གསུམ་པ་(མ་སྦྱངས་པའི་ཉེས་དམིགས་བཤད་པ་)ནི།

འདི་[25]ལ་མ་སྦྱངས་རྨོངས་ཚོད་ཀྱིས།།      འཆད་རྩོད་རྩོམ་པའི་གྲྭར་[26]འཇུག་པ།།

ཝ་སྐྱེས་སེང་ལྤགས་གྱོན་པ་བཞིན།། ནམ་ཞིག་རྗེས་ངན་གསལ་བར་འགྱུར།།

གཉིས་པ་ཉན་པར་བསྐུལ་བ་ནི།

དེ་ཕྱིར་བློ་གསལ་དོན་གཉེར་རྣམས།།      རྟགས་འཇུག་དཀའ་གནད་གཟུགས་བརྙན་ན།།

གསལ་བར་འཆར་བའི་མེ་ལོང་འདིར།།    ལ་འུར་[27]གཟིགས་མོར་ས་སྤྱོན་[28]དང་ཀྱེ།།

གསུམ་པ་བཟོད་གསོལ་ནི།

འདི་ལ་ནོངས་པའི་ཚོགས་མཆིས་ན།།      གཟུར་གནས་མཁས་པའི་སྤྱན་སྔར་འཆགས།།

བཞི་པ་དགེ་བ་བསྔོ་བ་ནི།

ཅུང་ཟད་འབད་ལས་ཐོབ་པའི་དགེས།།     ཀུན་གྱིས་འདི་དོན་རྟོགས་པར་ཤོག།

ལྔ་པ་མཛད་བྱང་ནི།     ཅེས་རྟགས་ཀྱི་འཇུག་པའི་སྙིང་པོའི་དོན་མདོ་ཙམ་བརྗོད་པ་དཀའ་གནད་གསལ་བའི་མེ་ལོང་ཞེས་བྱ་བ་འདི་ནི། རང་གི་སློབ་བུ་རྗེ་དྲུང་སངས་རྒྱས་རྒྱ་མཚོ་དང་དོན་གྲུབ་ཕུན་ཚོགས་གཉིས་ཀྱིས་དགོས་ཚུར་ལྟར། མཁས་མཆོག་སི་ཏུ་པཎ་ཆེན་དང་ཐམས་ཅད་མཁྱེན་པ་དྷརྨ་བྷ་དྲ་དཔལ་བཟང་པོའི་བཞེད་པ་དང་མཐུན་པར་དབྱངས་ཅན་གྲུབ་པའི་རྡོ་རྗེས་སྦྱར་བའོ།། །།

བར་འགོས་གཉིས་ཀྱི་ས་བཅད་དང་། རྨོངས་མཆན་ཐུམ་བུ་འདི་འཆལ་པོ་བདེ་ཆེན་རྡོ་རྗེས་སྣེ་འཁྲིད་སློབ་མའི་གོ་སྒྲིག་འོག་དབུ་མ་འོག་མ་ལོ་རིམ་གཉིས་པ་ཚོར་ཟུར་འཁྲིད་ཆེད་བྲེལ་ཚུབ་ངང་སྦྱར་བ་འདིར། ནོར་འཛོལ་སོགས་ཡོད་ངེས་པས་ཀུན་ལ་བཟོད་གསོལ་དང་སློབ་སྟོན་ཡོང་བའི་རེ་བ་དང་བཅས། ཕྱི་ལོ། ༢༠༡༡ ཟླ་བ། ༤ ཕྱི་ཚེས་༡༤ སྔ་དྲོ་ནས་འགོ་བཙུགས་ཏེ། ཕྱི་ཚེས་༡༧ གྱི་མཚན་མོ་ཆུ་ཚོད་ ༡༡།༣༧ ཐད་ཨོ་རྒྱན་བསམ་ཡས་ཆོས་འཁོར་གླིང་གི་རང་ཤག་ཏུ་མཇུག་སྒྲིལ་བར་བྱས་ཏེ་སྤེལ་བའོ།།

                                                      

---

[1]       བཅུ་དྲུག་ལང་ཚོ་ཅན་ལ་གོ་དགོས།    

[2]       གོང་དུ་བཀུར་བར་འོས་པ་ན་རྗེ། ཉེས་སྤྱོད་སྐྱོན་གྱིས་མ་བགོས་པས་ན་བཙུན་པའོ།།

[3]       མཁས་མཆོག་དངུལ་ཆོས་བཟང་ངམ་དྷརྨ་བྷདྲ། ཤཱཀྱའི་དགེ་སློང་མཁས་མཆོག་དངུལ་ཆུ་དྷརྨ་བྷ་དྲའམ་དངུལ་ཆུ་བླ་མ་ཆོས་བཟང་གིས་གནས་གཙང་གཡས་རུ་བཞད་ཀྱི་བྱེ་བྲག་དངུལ་ཆུའི་རི་ཁྲོད་དགའ་ལྡན་རྩེའི་སྤོང་ཁང་ དུ་རང་ལོ་ ༣༥ སོན་པའི་ཟད་པ་ཞེས་པ་མེ་སྟག་ལོ་སྟེ་ཕྱི་ལོ་ ༡༨༦༦ ལོའི་གྲོ་བཞིན་ཟླ་བ་སྟེ་བོད་ཟླ་ ༧ པའི་དཀར་ཚེས་དགའ་བ་དང་པོ་སྟེ་ཡར་ངོའི་ཚེས་ ༡ ཉིན་ལེགས་པར་བརྩམས་པ་ལགས་སོ།།  

[4]       རྩ་བའམ་གཞི་མ་ལྟ་བུ་ཡིན་པའི་དོན་ནོ།།

[5]       ཨ་ཀྱཱ་ཡོངས་འཛིན། གླེགས་བམ་གཉིས་པ། རྟགས་ཀྱི་འཇུག་པའི་དགོངས་དོན་རབ་གསལ། ཤོག ༢ ན་ ༤

[6]       མཚམས་འདིར་རྟགས་ཀྱི་འཇུག་པའི་རྩ་བ་ལས། ཇི་སྐད་དུ། ཕོ་ཡི་ཡི་གེ་འབའ་ཞིག་ལ། །སྡེ་པ་ཕྱེད་དང་བརྒྱད་གནས་པའང༌། །སྡེ་ཚན་ལྔ་རུ་དྲིལ་བྱས་ནས། །ཕོ་དང་མ་ནིང་མོ་དང་ནི། །ཤིན་ཏུ་མོ་དང་བཞི་བཞི་རུ། །སྡེ་པ་བཞི་པ་ཡན་ཆད་དབྱེ། ལྷག་མ་བཅུ་བཞི་གནས་པ་ལ། །ཙ་སོགས་གསུམ་ནི་ཅ་སོགས་སྦྱར། །ཝ་ནི་བ་དང་སྦྱར་བར་བྱ། །ལྷག་མ་དྲུག་ནི་མོ་རུ་སྦྱར། །ར་ལ་ཧ་ནི་མོ་གཤམ་སྟེ། །ཨ་ནི་མཚན་མེད་ཅེས་ཀྱང་བྱ། །

[7]       སྐབས་འདིར་རྟགས་ཀྱི་འཇུག་པ་ལས། སྔོན་འཇུག་ཡི་གེ་ལྔ་པོ་ལ། ཕོ་དང་མ་ནིང་མོ་དང་ནི། །ཤིན་ཏུ་མོ་དང་བཞི་རུ་དབྱེ།

[8]           དེ་ཡང་རྟགས་འཇུག་ལས། ཕོ་ནི་ཕོ་དང་མོ་ལ་འཇུག །མོ་ནི་མོ་དང་མ་ནིང་ལ། །མ་ནིང་ཡང་ནི་ཕོ་མོ་ལའོ། །ཤིན་ཏུ་མོ་ནི་མ་ནིང་དང་། །མོ་དང་ཤིན་ཏུ་མོ་ཉིད་ལའོ། །ཞེས་གསུངས་སོ།།

[9]           དེ་ཡང་རྟགས་འཇུག་ལས། ཕོ་ནི་མ་ནིང་ལ་མི་འཇུག །མོ་ནི་ཕོ་ལ་འཇུག་པ་མིན། །མ་ནིང་རང་ལ་རང་མི་འཇུག །རང་གི་སྡེ་དང་ཕྲད་པ་ན། །ཕོ་ཡང་མོ་ལ་འཇུག་མི་འགྱུར། །མ་ནིང་མོ་ཡང་དེ་བཞིན་ནོ། །ཞེས་གསུངས་སོ།།

[10]          དེ་ཡང་རྟགས་འཇུག་ལས། ཕོ་ནི་འདས་དང་གཞན་བསྒྲུབ་ཕྱིར། །མ་ནིང་གཉིས་ཀ་ད་ལྟར་ཆེད། །མོ་ནི་བདག་ད་མ་འོངས་ཕྱིར། །ཤིན་ཏུ་མོ་ནི་མཉམ་ཕྱིར་རོ། །ཞེས་གསུངས་སོ།།

[11]          ས་བཅད་དེ་ཡང་རྟགས་འཇུག་ལས། དེ་དག་རེ་རེའང་བཞི་བྱེད་དེ། །གང་ལ་འཇུག་བྱེད་གང་གིས་བྱེད། །ཇི་ལྟར་འཇུག་བྱེད་ཅི་ཕྱིར་བྱེད། །

[12]      གང་ལ་འཇུག་པར་བྱེད་ཅེ་ན། །ཕོ་ནི་ཕོ་དང་མོ་ལ་འཇུག། །མོ་ནི་མོ་དང་མ་ནིང་ལ། །མ་ནིང་ཡང་ནི་ཕོ་མོ་ལའོ། །ཤིན་ཏུ་མོ་ནི་མ་ནིང་དང༌། །མོ་དང་ཤིན་ཏུ་མོ་ཉིད་ལའོ། །ཕོ་ནི་མ་ནིང་ལ་མིང་འཇུག། །མོ་ནི་ཕོ་ལ་འཇུག་པ་མིན། །མ་ནིང་རང་ལ་རང་མི་འཇུག། །རང་གི་སྡེ་དང་འཕྲད་པ་ན། །ཕོ་ཡང་མོ་ལ་འཇུག་མི་འགྱུར། །མ་ནིང་མོ་ཡང་དེ་བཞིན་ནོ། །

[13]      སི་ཏུ་པཎ་ཆེན། མུ་ཏག་ཕྲེང་མཛེས་ལས་རྟགས་ཀྱི་འཇུག་པའི་སྐབས། ཤེས་རིག་དཔར་ཁང་གི་དཔར་གསར། ཤོག ༡༣༥

[14]      སྒྲ་ཤིན་ཏུ་ཆུང་ངུའམ། ཉམ་ཆུང་ལ་གོ་དགོས།

[15]      ཇི་ལྟར་འཇུག་པར་བྱེད་ཅེ་ན། །ཕོ་ནི་དྲག་པའི་ཚུལ་གྱིས་ཏེ། །མ་ནིང་རང་པར་འཇུག་པ་ཡིན། །མོ་ནི་ཞན་པའི་ཚུལ་གྱིས་ཏེ། །ཤིན་ཏུ་མོ་ནི་མཉམ་པས་སོ། །

[16]      སི་ཏུ་པཎ་ཆེན། མུ་ཏག་ཕྲེང་མཛེས་ལས་རྟགས་ཀྱི་འཇུག་པའི་སྐབས། ཤེས་རིག་དཔར་ཁང་གི་དཔར་གསར། ཤོག ༡༣༧

[17]      སྔོན་འཇུག་ཅི་ཕྱིར་འཇུག་པའི་གཞུང་གི་ས་བཅད་འདི་འགོས་ཀྱི་གླེང་བརྗོད་ཆེན་མོའི་དགོངས་དོན་གཞིར་བཟུང་བཀོད་པའོ།།

[18]      ཅི་ཕྱིར་འཇུག་པར་བྱེད་ཅེ་ན། །ཕོ་ནི་འདས་དང་གཞན་བསྒྲུབ་ཕྱིར། །མ་ནིང་གཉིས་ཀ་ད་ལྟར་ཆེད། །མོ་ནི་བདག་ད་མ་འོངས་ཕྱིར། །ཤིན་ཏུ་མོ་ནི་མཉམ་ཕྱིར་རོ། །

[19]      རྗེས་འཇུག་ཡི་གེ་བཅུ་པོ་ལ། །ཕོ་མོ་མ་ནིང་གསུམ་དུ་དབྱེ། །

[20]      གང་ལ་ཡི་གེ་ཐམས་ཅད་ལ། །གང་གིས་བཅུ་པོ་དེ་དག་གིས། །

[21]          སྔ་མ་གང་ལྟར་འགྱུར་བ་དང་། ཕྱི་མ་གང་ལྟར་འགྱུར་བ་གཉིས་ལ་གོ་དགོས།

[22]          ཕོ་ཡིས་ཕོ་ཡི་མིང་མཐའ་དྲང་། །མོ་ཡིས་མོ་ཡི་མིང་མཐའ་དྲང་། །མ་ནིང་གིས་ནི་མ་ནིང་ངོ་། །མིང་མཐའ་དེ་དག་ཉིད་ཀྱིས་ནི། །དེ་ཉིད་རང་གི་སྒྲ་མཐུན་པའི། །

[23]          བརྗོད་བདེ་ལ་གོ་དགོས།

[24]          སྔ་མ་ཞེས་པ་ཕྲད་རྣམ་དབྱེ་སོགས་འདྲེན་མཁན་གྱི་མིང་མཐའམ་རྗེས་འཇུག་ཉིད་ལ་གོ་དགོས།

[25]          འདི་སྒྲ་དེ་ནི། བརྡ་སྤྲོད་པའི་གཞུང་ལ་གོ་དགོས།

[26]          མཁས་པའི་གྲལ།།

[27]          ལ་འུར་ཞེས་པ་ནི། མགྱོགས་པོ་ལ་གོ་དགོས།

[28]          སྤྱོན་ནི། བྱོན་པའི་སྐུལ་ཚིག